Björninn – lágmenningarópera


Sviðslistahópurinn Sómi þjóðar og nokkrir ungir íslenskir tónlistarmenn taka höndum saman og hætta sér á nýjar slóðir í lágmenningaróperunni Birninum eftir William Walton. Bryddað er upp á nýju samtali við óperuformið á óhefðbundinn hátt þegar óperan hittir samtímaleikhúsið á hverfisbarnum Players í Kópavogi – og seinna meir á Tjarnarbarnum í Reykjavík.

Óperan verður frumsýnd 16. ágúst í Kópavogi, sem hluti af Cycle Music and Art Festival.

Aðstandendur sýningarinnar eru þau Tryggvi Gunnarsson, leikstjóri; Hugi Jónsson, barítón, í hlutverki Smirnovs, Guja Sandholt, mezzó-sópran, í hlutverki Popovu og Pétur Oddbergur Heimisson, bass-barítón, í hlutverki Luka. Tónlistarstjórn og píanóleikur er í höndum Matthildar Önnu Gísladóttur.

Hugmyndin á bak við uppfærsluna kviknaði fyrir rúmu ári síðan. „Okkur langaði til að setja upp öðruvísi óperu á Íslandi sem væri ekki steypt í hið hefðbundna mót stórra uppfærslna þar sem miklu þarf að kosta til og sýningarnar fara fram á stórum sviðum. Óperuformið býður upp á mikinn fjölbreytileika og það er hægt að setja upp góðar sýningar með takmörkuðu fjármagni á óvenjulegum stöðum,“ segir Guja Sandholt, söngkona og framleiðandi.

Um þessar mundir fer miðasala og hópfjarmögnun fram á Karolina Fund en allar nánari upplýsingar eru á þessum slóðum:
www.somithjodar.is
www.cycle.is
www.gujasandholt.com
https://www.facebook.com/pages/The-Bear-Björninn/446157625532380?fref=ts