Skólastarf er að fara aftur í gang í bænum og þá byrjar skutlið með börnin fram og til baka út um allar trissur. Íþróttavagn HK ætti að létta undir skutlið en hann byrjar aftur að ganga á mánudaginn .
HK er með þrjár starfsstöðvar víðsvegar um bæinn, í Fagralundi, Digranesi og Kórnum.
Í tilkynningu frá HK segir að til að gera sem flestum kleift að stunda sína íþrótt hjá félaginu óháð búsetu mun HK reka íþróttavagn samhliða skólaárinu. Fimm ferðir verða farnar á dag alla virka daga.
Farið verður frá Fagralundi (Dægrardvöl Snælandsskóla) upp í Kór og til baka með viðkomu í dægradvöl Álfhólsskóla og Vatnsendaskóla, einnig stoppar vagninn á tveimur stöðum við Fífuhvammsveg, við Lindaveg og Versali.
Fyrsta ferð frá Fagralundi/Snælandsskóla verður kl. 13.25 og sú síðasta kl. 17.32. Í fyrstu ferðum dagsins verður starfsmaður HK í vagninum til að aðstoða yngstu börnin.
Gert er ráð fyrir því að foreldrar barna í dægradvöl tilkynni starfsmönnum dægradvalar á hvaða tíma barnið á að vera tilbúið til að fara með Íþróttavagninum á æfingu.
Gert er ráð fyrir að þegar vagninn kemur verði hópurinnn tilbúinn til að fara á æfingu.
Tímaáætlun gerir ekki ráð fyrir langri bið eftir einstaka börnum á hverjum stað.
Börnum úr Álfhólsskóla og Snælandsskóla verður ekið til baka að skólalóð sinna skóla eftir æfingar í Kórnum.
Börnum úr Vatnsendaskóla verður ekki ekið til baka þangað. Gert er ráð fyrir að þau geti annaðhvort farið sjálf eða foreldrar sækja þau í Kórinn.
Börnum úr Hörðuvallaskóla verður fylgt yfir í Kórinn þegar það á við.
Búið er að gera ráð fyrir að þau börn sem ljúka æfingum í knattspyrnu klukkan 15:00 og verða sótt geti leikið sér sjálf í fótbolta á tilteknu svæði vallarins (inni í Kórnum) á meðan þau bíða.
