Skýr valkostur í Kópavogi


Hákon Helgi Leifsson, 2. sæti Pírata í Kópavogi.

Kæru Kópavogsbúar.

Senn líður að kosningum og við Píratar erum tilbúnir að bjóða íbúum Kópavogs skýran valkost þann 26.maí.

Píratar í Kópavogi lýsa yfir vilja til samstarfs við alla sem vilja virkja þá miklu krafta sem aukin áhersla á íbúalýðræði leysir úr læðingi, þar sem aukið gagnsæi er í fyrirrúmi og framtíðarsýn þar sem kjörnir fulltrúar og stjórnsýslan öll, hefur hið mannlega að leiðarljósi: Auðmýkt, samkennd, virðingu og ábyrgð.

Komandi kosningar eru þær fimmtu sem Píratar taka þátt í á jafn mörgum árum. Á þessum tíma höfum við vaxið frá því að vera lítill hópur hugsjónarfólks, yfir í stjórnmálafl með hugrekki og þor að feta nýjar slóðir í landslag stjórnmálanna.

Fyrirmynd okkar frambjóðenda Pírata í Kópavogi er þingflokkurinn sem hefur ítrekað sannað mikilvægi sitt og dugnað við að upplýsa og afhjúpa það sem áður var hulið leynd. Þingflokkur Pírata er aðhalds- og umbreytingaafl í landsmálum og þannig munum við starfa í sveitastjórn.

Sérstaða Pírata og þroski fellst í nálgun okkar til stjórnmálanna og þá sérstaklega þeim gildum sem Píratar settu sér í byrjun. Algengur misskilningur er að Píratar byggja á spánnýum gildum og nálgun sem aldrei hefur verið prófuð áður. Áherslur okkar á lýðræði, gagnsæi, friðhelgi, jafnrétti og frelsi eru aldargömul gildi sem aftur og aftur hafa sýnt sig að virki. Hinir rótgrónu og gömlu flokkar hafi að okkar mati frekar villst af leið og fjarlægst þessar undirstöður.

Pírötum í Kópavogi þykir gott að stjórnmálaflokkar sveitarfélagsins hafi fylgst með stefnum okkar og innleitt opið bókhald ásamt íbúalýðræði hér í Kópavogi. Það segir okkur jafnframt að stjórnmálamenningin í Kópavogi sé bæði heilbrigð og móttækileg fyrir hugmyndafræði okkar Pírata, gildum og nálgun.

Við erum stoltir Kópavogsbúar og með ykkar stuðningi viljum við gera Kópavog opnari og lýðræðislegri, öllum til góðs.

Gerum góðan bæ betri.