Sósíalistaflokkurinn býður fram í Kópavogi


Frambjóðendur Sósíalistaflokksins í Kópavogi.

Kæru Kópavogsbúar.

Bæjaryfirvöld í Kópavogi hafa brugðist okkur illilega á síðustu kjörtímabilum.

Við sem bjóðum fram fyrir sósíalista í Kópavogi í komandi sveitastjórnarkosningum erum fólkið sem ekki upplifir meint góðæri. Við erum fólkið sem hvorki getur keypt né leigt húsnæði á ómannúðlegum húsnæðismarkaði eða sjáum börnin okkar festast fullorðin í foreldrahúsum. Við erum jafnvel fullorðnu börnin sem eru föst í foreldrahúsum. Við erum fólkið sem notar kerfið eða þarf á því að halda og kerfið hefur brugðist. 

Þrjátíu prósent fólks hefur vart til hnífs og skeiðar eða er húsnæðislaust vegna þeirra strauma sem viðgengist hafa í stjórnmálum á Íslandi undanfarna áratugi. Stéttskipting eykst jafnt og þétt og millistéttin er að renna niður í lágstéttina. Ójöfnuður í skólakerfinu eykst að sama skapi.

Það er ótækt að svona stórt bæjarfélag eins og Kópavogur leggi línurnar í launum til þeirra lægst settu á vinnumarkaði á þann hátt að það geti ekki lifað með reisn, geti ekki séð fyrir sér og sínum á þeim launum. Það er ótækt að Kópavogsbær viðurkenni ekki að við stöndum frammi fyrir verstu húsnæðiseklu síðan á stríðsárunum og taki ekki þátt í að koma fólki í öruggt skjól á viðráðanlegum leigukjörum.

Það er staðreynd að Kópavogsbær hefur ekki fjölgað félagslegum úrræðum í húsnæðismálum á síðasta kjörtímabili og viðmið voru beinlínis hækkuð svo hægt væri að skera niður þann lista fólks í neyð. Eins og hægt sé að skera í burtu vandann í samfélaginu. Elítustjórnmálin og núverandi meirihluti í bæjarstjórn eru hluti af þessum vanda. 

Við sósíalistar krefjumst mannúðlegra samfélags. Við krefjumst þess að fólk fái að lifa með reisn, að hægt sé að lifa af laununum og að eldri borgarar og fatlaðir fái þá þjónustu sem þeim ber. Við krefjumst þess að biðlistar heyri sögunni til og að í bæjarfélaginu okkar verði velferð og mannúð sett í fyrsta sæti.

Kjósum sósíalista 26. maí og færum völdin til fólksins!