Ármann Kr. Ólafsson, bæjarstjóri Kópavogs, afhenti leikskólastjórum bæjarins 100 spjaldtölvurnar og 20 fartölvur á leikskólanum Efstahjalla .
Spjaldtölvurnar voru afhentar með fjölmörgum smáforritum sem nýtast í kennslu á leikskólastigi. Námskeið verða haldin fyrir alla kennara í leikskólum Kópavogs og framhaldsnámskeið fyrir þá kennara sem eru lengra komnir.
Spjaldtölvur hafa verið notaðar með góðum árangri í kennslu í leikskólum Kópavogs, að því er fram kemur í tilkynningu frá bænum. Þær hafa nýst í sérkennslu, tungumálakennslu og við úrlausn einfaldra sem flókinna verkefna fyrir börn á leikskólaaldri. Með fleiri spjaldtölvum fjölgar möguleikum á notkun tækjanna.
Ármann Kr. Ólafsson, bæjarstjori segir afhendingu spjaldtölva vera kaflaskil í leikskólastarfi í Kópavogi.
Spjaldtölvurnar eru fyrirtaks viðbót við þann fjölbreytta efnivið sem leikskólarnir bjóða upp á til að örva börn í námi og leik. Spjaldtölvuvæðing leikskólanna er líka í góðu samræmi við þá stefnu meirihlutans að skólar í Kópavogi séu í fremstu röð. Öflug og rétt notkun upplýsingatækni á öllum skólastigum styrkir nemendur okkar.
Afhending spjaldtölvanna helst í hendur við uppsetningu þráðlauss nets í leik- og grunnskólum Kópavogs. Nettengin leikskólanna í Kópavogi, sem eru 19 talsins, var stækkuð þrefalt árið 2013 og er uppsetningu þráðlauss nets nú lokið í öllum nema tveimur leikskólum Kópavogs. Þráðlaust net eykur mjög á notkunarmöguleika spjaldtölva og fartölva í skólastarfi, segir í tilkynningu frá Kópavogsbæ.
Fram kemur að í fyrra voru auk þess allar borðtölvur leikskólanna uppfærðar í vinnurýmum kennara og hjá stjórnendum. Um er að ræða samtals 100 öflugar borð- og fartölvur.
Kostnaður við uppsetningu á þráðlausu neti og kaup á búnaði fyrir leikskóla eru um 30 milljónir króna á þessu ári. Í þeirri upphæð er einnig kostnaður við lagfæringar á lögnum sem reyndust nauðsynlegur undanfari uppsetningarinnar.
