Biðtími allt að þremur árum
Gerpla flutti frá Skemmuveginum í glæsilegt æfingarhúsnæði í Versölum fyrir nokkrum árum en nú er það húsnæði orðið of lítið fyrir vaxandi starfsemi. Fimleikar njóta gríðarlegra vinsælda hjá börnum og unglingum í bænum, ekki síst vegna glæsilegs árangurs Gerplu í fimleikum á
undanförnum árum. Fimleikadeildin hjá Gerplu er gríðarlega stór, en um 1800 iðkendur æfa nú hjá félaginu. Auður Inga Þorsteinsdóttir, framkvæmdastjóri Gerplu, segir að félagið hafi verið í samskiptum við bæjaryfirvöld varðandi húsnæðismál félagsins í þó nokkurn tíma og það liggi fyrir tillaga um að Gerpla verði með aðstöðu í Vatnsendaskóla. Sú bygging á að vera tilbúin árið 2016.
Félagið hefur gripið til skerðingar á fjölda æfingatíma til þess að koma núverandi iðkendum fyrir en á tímabili fyrir nokkru síðan leit út fyrir að Gerpla gæti ekki leyft öll-um núverandi iðkendum að æfa áfram vegna skorts á plássi,
segir Auður Inga og bætir við að nýtingin á Gerplusalnum sé mjög mikil enda hefur verið sett þak á einungis 200 iðkendur í salnum í einu.
Deildin hjá Gerplu er gríðarlega stór og biðlistarnir eru aldursskiptir. Á tímabili lokuðum við fyrir frekari skráningar en það var eftir að meira en 1000 börn voru komin á biðlistann. Í dag eru um 500 börn á listanum. Það er mjög mismunandi eftir því á hvaða aldri iðkendurnir eru hversu fljótt þeir komast inn. Það er auðveldast að komast inn í yngstu flokkana fyrir 3-4 ára. Það er mjög erfitt að komast inn í félagið á aldrinum 7-10 ára og þar hafa sumir beðið í allt að þrjú ár eftir því að fá úthlutað plássi.
