Tillaga að nýju aðaskipulagi Kópavogs fyrir næstu 12 árin hefur verið birt á vef Kópavogs, www.kopavogur.is Á meðal þeirra tillagna sem helsta athygli vekur er að gert er ráð fyrir breyttri landnýtingu við Kópavogshöfn þar sem vannýtt athafnahúsnæði á að víkja fyrir 550 íbúðum.
Liður í þessum áformum er að liðka fyrir umferð með bættum vegtengingum og byggja brú yfir Fossvog fyrir gangandi og hjólandi umferð. Ármann Kr. Ólafsson, bæjarstjóri, segir, í samtali við Kópavogsfréttir, að göngu- og hjólabrú frá Kársnesi og yfir í Nauthólsvík bjóði upp á mikla möguleika þar sem tenging skapast við háskólasamfélagið, Landspítalann – fjölmennasta vinnustað landsins – og miðbæ Reykjavíkur. Ljóst má því vera að ásókn verði í þetta svæði, ef áform ganga eftir.
Guðmundur Grimsson hjá fyrirtækinu Time Tours, sem þjónar erlendum ferðamönnum, hefur aðstöðu á svæðinu í gömlum bragga sem kominn er til ára sinna. Hann segist fagna hugmyndum um uppbyggingu á svæðinu.
„Það eru mörg atvinnuhús hér í nágrenni við Kópavogsbryggju sem eru orðin ansi þreytt og lúin með takmarkaða starfsemi í. Þau mættu gjarnan víkja. Mér líst mjög vel á þessi áform að tengja Kársnesið við Nauthólsvíkina og nýta þá möguleika sem hér eru. Hér þarf að horfa til langs tíma og mér líst mjög vel þessar hugmyndir,“ segir Guðmundur.
