560 tonn af sandi á götum og göngustígum bæjarins.

Það hefur verið mikið álag á Bjarna Jónssyni, eftirlitsverkstjóra Áhaldahússins, og mönnum hans sem bera á salt og sand á götur, göngustíga, bílastæði og skólalóðir til að auðvelda samgöngur. Hálkan er búin að vera erfið í ár.

„Þetta hefur verið griðarlegur barningur. Það sem er erfiðast fyrir okkur eru þessar sífeldu veðrabreytingar,“ segir Bjarni. „Við erum búnir að nota 560 tonn af sandi frá áramótum sem er talsvert mikið magn. Það versta er að stundum verður þetta til lítils gagns eftir tvo daga þegar búið er að bráðna og frysta aftur. Þá þarf að bera á aftur. Ég hef ekki tölu á hversu miklu magni af salti við höfum notað en við erum með menn á tíu tækjum á tíu til tólf tíma vöktum sem eru stöðugt að.“

Hvernig er svo útlitið fyrir næstu daga?

„Þetta verður tæpt. Hitastig verður í kringum frostmark áfram og svo á að frysta aftur á sunnudag. Það er svosum allt í lagi ef við losnum við úrkomuna sem frystir aftur á meðan,“ segir Bjarni Jónsson, eftirlitsverkstjóra Áhaldahússins.