Leikfélag Kópavogs frumsýnir stórvirkið Þrjár systur
Liðsmenn Leikfélags Kópavogs hafa keppst við undanfarnar vikur og nú hillir undir að árangur erfiðisins líti dagsins ljós því næstkomandi föstudag, 31. janúar, frumsýnir félagið Þrjár systur eftir Anton Tsjekhov í Leikhúsinu við Funalind. Er þetta viðamesta sýning félagsins í húsinu.
Þrjár systur telst löngu orðið klassískt verk, það er skrifað snemma á síðustu öld en efni þess á þó erindi á öllum tímum. Brugðið er upp mynd af fólki sem elur með sér drauma um betra líf en hefur ekki döngun í sér til að láta þá rætast.
Um 15 leikarar taka þátt í sýningunni en auk þeirra leggja fjöldamargir hönd á plóg. Leikstjóri er Rúnar Guðbrandsson sem vakið hefur mikla athygli á síðustu árum fyrir vandaðar og áleitnar sýningar, síðast Stóru börnin og þar áður Hvörf um Guðmundar og Geirfinnsmál. Klæmint Henningsson Isaksen sér um leikmynd, Dýrleif Jónsdóttir um búninga, Skúli Rúnar Hilmarsson um lýsingu og Hörður Sigurðarson um hljóðmynd og myndvinnslu. Vilborg Valgarðsdóttir og Sara Dögg Davíðsdóttir annast förðun.
Starfsemi Leikfélags Kópavogs hefur verið einkar kröftug á leikárinu. Það hófst á námskeiði unglingadeildar félagsins fyrir nýja og eldri þátttakendur sem lauk með sýningunni Kemurr’ á deit? Í haust var einnig gerð tilraun með leikstarf fyrir 10-12 ára. Sú tilraun heppnaðist ákaflega vel og líklega verður framhald á. Í nóvember var flutt leikdagskráin Mixtúra sem samanstóð af þremur leikþáttum. Í byrjun árs var hið árlega Stjörnuljósakvöld þar sem boðið var upp á leikatriði og tónlistarflutning. Þá hefst leiklistarnámskeið fyrir nýliða þ. 10 febrúar.
Eins og áður segir verður sýningin Þrjár systur frumsýnd næstkomandi föstudag. Næstu sýningar verða síðan sunnudaginn 2. febrúar, föstudaginn 7. og sunnudaginn 9. febrúar. Miðasala er á midakaup.is/kopleik en einnig er hægt að panta miða með því að senda póst á midasala@kopleik.is. Nánar má lesa um sýninguna og starfsemi félagsins á www.kopleik.is
