Daði Rafnsson, yfirþjálfari yngri flokka Breiðabliks, ritar frábæra grein á breidablik.is sem á brýnt erindi.
„Nýlega hélt Breiðablik uppskeruhátíð yngri flokka með öðru sniði en áður. Leikmenn meistaraflokkanna Árni Vilhjálmsson, Sverrir Ingi Ingason, Þórdís Hrönn Sigfúsdóttir, Rakel Ýr Einarsdóttir, Guðjón Pétur Lýðsson og Tómas Óli Garðarsson afhentu viðurkenningarskjöl þeim sem voru að klára eldri ár í sínum flokkum. Bjarni Töframaður sýndi listir sínar og Björgvin Rúnarsson, vallarþulur Breiðabliks stýrði af stakri prýði.
Mig langar til að segja iðkendum og foreldrum aðeins frá því af hverju við Blikar erum nú hætt að veita verðlaun fyrir besta og efnilegasta leikmanninn og Blika ársins og erum byrjuð að útskrifa alla upp um flokk í staðinn.
Alfreð Finnbogason er einn efnilegasti fótboltamaður sem við Blikar höfum átt. Hann raðar inn mörkunum í Hollandi og er reglulega orðaður við stórlið á borð við AC Milan. En ég veit ekki hvort þið vitið það að Alfreð segir að erfiðustu árin hans í fótbolta hafi verið milli 16 og 18. ára.
Alfreð komst ekki alltaf í liðið í þriðja flokki og hann var aldrei valinn í yngri landslið Íslands. Hann spilaði í 2. flokki Breiðabliks og í Augnabliki áður en hann varð fastamaður í meistaraflokki Breiðabliks. Alfreð sagðist hafa verið lítill og seinþroska og átti erfitt með að komast framhjá mönnum sem voru orðnir líkamlega sterkari.
En Alfreð hætti aldrei og hann gafst aldrei upp. Í staðinn settist han niður og setti sjálfum sér markmið þegar hann var 18 ára. Skömmu seinna var hann orðinn Íslands- og bikarmeistari með Breiðabliki. Svo komst hann í 21 árs landsliðið sem komst í úrslit Evrópukeppninnar. Svo fór hann til Belgíu, Svíþjóðar og Hollands. Það verður spennandi að fylgjast með því hvert hann fer næst.
Óli Kristjáns segir að mesti kostur Alfreðs sé að hann verður alltaf betri eftir því sem hann kemst lengra. Hann var betri í meistaraflokki heldur en í öðrum flokki, betri í landsliðinu heldur en meistaraflokki, betri í atvinnumennskunni heldur en á Íslandi. Í hvert sinn sem hann kemst lengra heldur hann áfram.
Við þjálfararnir í Breiðabliki viljum hvetja okkar leikmenn til að halda alltaf áfram. Stundum tapar maður og stundum er maður ekki í liðinu. Stundum gengur manni ekki nógu vel og stundum er bara auðveldast að hætta. Það er erfitt að verða góður í fótbolta. Ef það væri auðvelt væru allir góðir í fótbolta. En það geta allir orðið betri. Maður þarf að mæta á æfingar, leggja sig fram og gera sitt besta. Þá fær maður mikið út úr fótbolta eins og öllu öðru sem maður gerir af öllu hjarta.
Þegar Alfreð var nítján ára vorum við að sýna honum og öðrum leikmönnum úr meistaraflokki erfiða boltatækni. Það vakti athygli mína að þegar aðrir voru hættir, höfðu gefist upp, sögðu “ég get ekki”, þá hélt hann áfram. Og hann náði að lokum erfiðasta bragðinu þegar aðrir voru hættir. Þess vegna hefur Alfreð náð lengra en flestir aðrir í fótbolta á Íslandi. Honum mistókst oftar heldur en hinum en hélt áfram og uppskar að lokum, eins og Sara, Fanndís, Jói Berg og allir Blikarnir okkar sem eru að spila í landsliðum, atvinnumennsku og meistaraflokki.
Það verða ekki allir atvinnumenn eins og Alfreð og Fanndís. En sumir spila í úrvalsdeild, aðrir í neðri deildum. Sumir spila í háskóla erlendis. Flestir spila útaf því að það er svo gaman. Maður fær góða hreyfingu og fær að vera með vinum sínum og kynnast fullt af fólki. Maður lærir að vinna með öðru fólki, setja sér markmið og temja sér góð vinnubrögð. Það er ekki lítið.
Það erfiðasta við að vera þjálfari í Breiðabliki er að velja einn eða tvo leikmenn af hundrað og segja, þú ert bestur. Þú ert efnilegastur. Þú ert svo mikilvægur fyrir liðið okkar. Þá erum við nefninlega að verðlauna ungt og efnilegt fólk fyrir það sem það er búið að gera, í staðinn fyrir það sem það getur orðið. Og við erum að velja allt of fáa með því að draga fram einn og tvo af hundrað. Við höfum nefnilega trú á öllum hundrað, að þið getið öll orðið enn betri en þið eruð í dag. Þess vegna viljum við verðlauna ykkur fyrir að klára flokkinn ykkar. Það er það sem skiptir máli, að halda áfram, að leggja sig fram, að gera sitt besta.
Þetta eru skilaboðin sem við þjálfararnir í Breiðabliki viljum senda ungu fólki í okkar umsjón.
Þið skiptið okkur öll gríðarlega miklu máli. Við þökkum ykkur kærlega fyrir tímabilið sem er að ljúka og hlökkum til að fylgjast með ykkur um ókomin ár.“
Daði Rafnsson yfirþjálfari yngri flokka Breiðabliks.
