Nítíu ungmenni, á aldrinum 11 – 16 ára, frá 19 löndum í Evrópu etja nú kappi á alþjóðlegu tennsmóti sem haldið er í Kópavogi. Mótið, sem ber heitið Icelandic Easter Open er haldið af Tennissambandi Íslands og Tennishöllinni og fer fram í Tennishöllinni í Kópavogi.
Ellefu íslenskir keppendur taka þátt og meðal þeirra eru Anna Soffía Grönholm sem er núverandi Íslandsmeistari kvenna innanhúss og Hjördís Rósa Guðmundsdóttir sem er núverandi Íslandsmeistari kvenna utanhúss.
Í karlaflokki tekur Anton J. Magnússon þátt. Hann er nýkominn frá Tyrklandi þar sem hann hafnaði í öðru sæti á mótaröð þróunarmeistaramóts Evrópu fyrir 14 ára og yngri. Þessi frábæri árangur Antons skilaði honum inn í úrvalslið tennissambands Evrópu fyrir 14 ára og yngri, fyrstur Íslendinga. Hann mun ferðast með úrvalsliðinu í sumar og keppa á 4-5 stórmótum tennissambands Evrópu. Anton, sem er án efa einn efnilegasti tennisspilari Íslands, býr á Spáni og æfir þar af miklum krafti í „Ferrer Academy“ rétt fyrir utan Valencia. Ferrer Academy er rekinn af David Ferrer sem er sjötti besti tennisspilari heims og hefur verið í topp 10 síðustu ár.
