Árshátíð Nemendafélags MK fór fram nýverið, í skugga nýafstaðins kennaraverkfalls. Hátíðin, sem fór fram í íþróttahúsinu Digranesi, var vel sótt og skemmtu gestir sér vel.
Í árshátíðarvikunni hefur myndast sú hefð í MK að kosningar fari fram fyrir næsta skólaár. Ný stjórn nemendafélagsins var kosin. Í henni sitja Arnar Örn Ingólfsson, formaður, Bjarni Haukur Magnússon, ritari, Metúsalem Björnsson, gjaldkeri og Berglind Þóra Bragadóttir, margmiðlunarstjóri.
Aðspurður segist Arnar vera spenntur fyrir næsta skólaári. Á síðustu árum hefur félagslífið verið í mikilli uppsiglingu og kveðst Arnar ætla að halda þeirri uppbyggingu áfram. Undirbúningur er strax hafinn fyrir næsta skólaár því busaballið verður snemma á næsta ári og sömuleiðis móttökudagur fyrir nýnema og nýnemaferðin. Næst á dagskrá hjá MK-ingum eru þó langir dagar sem fara í próflestur og lærdóm.
