Atvinnumál í Kópavogi

Theodóra Sigurlaug Þorsteinsdóttir, oddviti Bjartrar framtíðar í Kópavogi.
Theodóra Sigurlaug Þorsteinsdóttir, oddviti Bjartrar framtíðar í Kópavogi.

Það er mikil þörf á að fjölga störfum í Kópavogi. Björt framtíð vill setja atvinnumál í Kópavogi í forgang, byggja upp fjölbreytt störf og skapa þannig grunn undir vaxandi tekjur inn í framtíðina. Sveitarfélög hafa þann tilgang að veita þjónustu og tryggja íbúum ákveðin lífsgæði. Oftast er um að ræða lögbundin verkefni en sameiginleg velferðarmál eru einnig áberandi. Eitt meginverkefna sveitarfélaga snýst einnig um að efla atvinnuþróun innan sveitarfélagsins en verkefni af því tagi eru gjarnan skýrð með hliðsjón af þeim aðstæðum sem uppi eru í þjóðfélaginu hverju sinni.

Kópavogur er þar ekkert einsdæmi. Sveitarfélög á landinu öllu hafa stutt við atvinnulíf og nýsköpun um áratuga skeið með ýmsum nefndum, sjóðum og félögum s.s., atvinnuþróunarfélögum, atvinnumálanefndum, markaðsstofum og rannsóknar- og þróunarsjóðum. Víða á Íslandi hafa Markaðsstofur verið stofnaðar með miklum árangri í atvinnumálum. Til þess að samstarfið gangi sem best þá er heppilegast að í stjórn sé bæði fólk úr atvinnulífinu og fólk kosið til þess í bæjarstjórn. Þannig er fyrirkomulagið hjá Markaðsstofu Kópavogs.

Sýnum ábyrgð

Þörf er á að fjölga störfum í Kópavogi, atvinnuleysi er talsvert og fjárhagsaðstoð sem sveitarfélagið er bundið af að veita eykst með viðvarandi atvinnuleysi. Ekki er síður þörf á að auka tekjur þeirra stofnana sem bærinn rekur, safnanna og tónleikasals. Raunar er fækkun safngesta staðreynd og rekstur safnanna dýr. Það er í mínum huga ábyrgðarleysi að bregðast ekki við  slíkri stöðu, ekki síst þegar öðrum sveitarfélögum tekst að laða að ferðamenn, t.d. með því að markaðssetja söfn.

Þá kann einhver að velta fyrir sér hvort við eigum að sitja hjá og láta ferðamenn renna undir Hamraborgina og til baka í Leifstöð eða hvort við eigum að gera þeim tilboð um að heimsækja söfnin okkar og skapa tekjur rétt eins og önnur bæjarfélög gera.  Við skulum skoða þetta með opnum huga og ekki segja blákalt að ferðamenn eigi ekki erindi í Kópavog.

Verslunarmiðstöðin Smáralind tók sig til og hóf rekstur ferðamannavagns í fyrrasumar sem skilaði þeim þúsundum erlendra gesta. Vagninn fer frá Upplýsingamiðstöð ferðamanna, á nokkur hótel og svo í verslunarmiðstöðina.  Til þess að efla miðbæ Kópavogs þá var samið við rekstaraðila um að koma við á menningartofunni við Hamraborg og auka þar með aðgengi ferðmanna að henni enda talið að það skipti máli fyrir söfnin.

Markaðsstofan hefur einnig gert samning við Hópbíla Teits Jónassonar um að koma með yfir 2000 þýska ferðamenn í Kópavog í sumar. Erlendir ferðamenn koma einnig reglulega í tengslum við íþróttaviðburði sem styrkir bæði íþróttafélögin og verslun og þjónustu. Það er óskandi að við náum að landa fleiri slíkum samningum því íþrótta- og menningatengd ferðaþjónusta skiptir verulegu máli fyrir atvinnustigið í Kópavogi. Staðreyndin er sú að í hvert skipti sem ferðamaður greiðir fyrir vöru í Kópavogi þá hækkar hann atvinnustigið. Ég geri mér grein fyrir því að þetta er ný hugsun í Kópavogi en ef ferðaþjónusta virkar í öðrum sveitarfélögum þá virkar hún hér. Við skulum samt vera þolinmóð því slík uppbygging gæti tekið einhvern tíma.

Styrkjum stöðu Kópavogs saman
Undanfarin ár hef ég lagt mig fram um að vinna af heilindum að uppbyggingu í Kópavogi, m.a. með því að leggja fram tillögu að stofnun Markaðsstofu Kópavog. Sjálf á ég enga hagsmuni að gæta og hef aldrei þegið laun fyrir störf mín á þeim vettvangi. Markaðsstofunni er ætlað að styrkja stöðu Kópavogs sem næststærsta sveitarfélags landsins, áfangastaðar í ferðaþjónustu og miðstöðvar verslunar og þjónustu. Með aðkomu Markaðsstofunnar hafa verið stofnuð hagsmunasamtök atvinnufyrirtækja í Smiðjuhverfi og undirbúningur hafinn á svæðinu við Bæjarlind og einnig við Nýbýlaveg. Stefnt er að því að stofna slík samtök í öllum atvinnuhverfum í Kópavogi. Það er ánægjulegt að finna þau jákvæðu viðbrögð sem við fáum frá fyrirtækjum við það eitt að þau komi að borðinu, taka þátt í opnu samtali og vinna saman að bestu lausn.

Ég vil halda áfram að vinna að hugmyndum um betri og öflugri Kópavog, þess vegna vel ég að bjóða fram með Bjartri framtíð. Ég hef meiri trú á að með samvinnu, rökræðu og samtali við íbúa, starfsmenn Kópavogsbæjar og fyrirtæki þá sé líklegra að ná góðum árangri. Þannig getum við öll átt okkar þátt í að gera Kópavog betri, öflugri, fallegri og eftirsóknarverðari stað að búa á.

Björt framtíð í Kópavogi gengur óbundin til kosninga !

 -Theodóra S. Þorsteinsdóttir, lögfræðingur, formaður stjórnar Markaðsstofu Kópavogs og oddviti Bjartrar framtíðar í Kópavogi.

 

 

 

 

 

 

Deildu:

Facebook
Twitter
Pinterest
LinkedIn

Fleiri fréttir

Stórskemmtileg leiksýning fyrir yngstu kynslóðina

Leikfélag Kópavogs sýnir um þessar mundir barnaleikritið Ferðin til Limbó eftir Ingibjörgu Jónsdóttur (1953-1986) sem sett var upp í Þjóðleikhúsinu í janúar 1966. Leikritið byggir á barnabókinni Músabörn í geimflugi eftir sama

Er svefn besta verkjalyfið?

Svefn er ein af grunnstoðum góðrar heilsu ásamt góðri næringu, hreyfingu og vellíðan. Þegar við sofum notar líkaminn tímann til að endurnýja sig og undirbúa okkur fyrir næsta dag. Svefn