Árlegir tónleikar Karlakórs Kópavogs verða að þessu sinni haldnir í Borgarleikhúsinu og kemur það til vegna þátttöku kórsins í uppfærslu á Njálu nú í vetur.
Til að halda í hefðina ætlar kórinn, í samvinnu við Salinn, engu að síður að standa fyrir einum tónleikum í heimabyggð, fimmtudaginn 28. apríl kl. 20.00. Félagi eldriborgara er sérstaklega boðið, en allir sem áhuga hafa eru velkomnir. Aðgangur er ókeypis.
Karlakór Kópavogs er 50 manna karlakór. Hann mun á tónleikunum flytja brot af því besta í íslenskum karlakórslögum, þjóðlögum og öðrum hljómfögrum perlum í útsetningu fyrir karlakór. Einsöngvari mun kíkja í heimsókn.
Stjórnandi er Garðar Cortes og píanóleikari er Hólmfríður Sigurðardóttir.
