Flutningur talinn hagkvæmasti kostur
Skrifstofuhúsnæði bæjarskrifstofa Kópavogs er illa farið og kemur því til álita að flytja starfsemina úr Fannborg í annað húsnæði. Núverandi húsnæði þarfnast verulegs viðhalds og hljóðar kostnaðaráætlun endurbóta á húsnæðinu upp á 300 milljónir. Bæjarskrifstofurnar eru nú í þremur húsum, í Fannborg 2, 4 og 6. Frumathugun á öðrum kostum, að flytja eða byggja nýtt húsnæði, hefur leitt í ljós fjárhagslegan ávinning af því að flytja bæjarskrifstofurnar annað.
Sigríður Björg Tómasdóttir, upplýsingafulltrúi Kópavogsbæjar, segir í samtali við Kópavogsblaðið að til hafi staðið að ráðast í endurbætur á húsnæðinu í Fannborg nú í ár. Þegar húsið var skoðað nánar þá hafi komið í ljós að ástand þess var mun verra en talið var í fyrstu og þarfnast verulegra endurbóta.
verulegs viðhalds.
Vegna þess hversu kostnaðarsamar þær endurbætur myndu verða var ákveðið að fá verkfræðistofuna Mannvit til að kanna hvað myndi kosta annars vegar að kaupa nýtt húsnæði og hins vegar að byggja nýjar bæjarskrifstofur á lóð bæjarins. Niðurstaða þeirrar athugunar liggur nú fyrir. Fjárhagslegur ávinningur er sagður vera í því að flytja starfsemina og selja núverandi húsnæði í Fannborg. Ræður þar meðal annars miklu að starfsemin kæmist fyrir í mun minna húsnæði eða um 3.000 fermetrum í stað 4.500 fermetra nú, að sögn Sigríðar. Þar sem hagkvæmara virðist vera að kaupa nýtt húsnæði eða byggja í stað endurbóta á núverandi húsnæði mun bærinn skoða þá kosti enn frekar.
Aðspurð staðfestir Sigríður heimildir Kópavogsblaðsins að Norðurturn Smáralindar sé einn þeirra kosta sem Kópavogsbær hefur skoðað undir nýjar bæjarskrifstofur. „Niðurstaða athugunarinnar er sú að það er óhagkvæmt að ráðast í endurbætur í samanburði við kaup eða byggingu á nýju húsnæði. En það á eftir að meta styrkleika og veikleika þess að flytja bæjarskrifstofurnar í nýjan miðbæ bæjarins.“
