Bergljót Kristinsdóttir bæjarfulltrúi Samfylkingarinnar gefur kost á sér í fyrsta sæti á lista Samfylkingarinnar í Kópavogi. Yfirlýsing hennar er svohljóðandi:
„Dagana 18 – 19 febrúar fer fram flokksval um þrjú efstu sætin á lista Samfylkingarinnar í Kópavogi. Þátttaka er heimil félagsmönnum og skráðum stuðningsmönnum Samfylkingarinnar sem búa í Kópavogi. Hægt er að skrá sig sem stuðningsaðila eða félaga til hádegis þann 11. febrúar á slóðinni https://xs.is/takathatt.
Á yfirstandandi kjörtímabili hef ég ásamt Pétri Hrafni Sigurðssyni staðið vaktina í bæjarstjórn fyrir hönd Samfylkingarinnar. Pétur víkur nú af vettvangi og því bíð ég mig fram til að taka við keflinu sem oddviti. Reynsla og þekking á þeim mörgu málaflokkum sem unnið er að á vettvangi bæjarmála er mjög mikilvæg. Því miður er það svo að fáir endast mjög lengi í þessum störfum og því kvarnast hratt úr reynslubanka þeirra sem bera keflið á hverjum tíma. Ég tel nauðsynlegt að viðhalda þekkingu bæjarfulltrúa á milli kjörtímabila því gjörðir og ákvarðanir eiga jú að halda lengur en í fjögur ár og þær þarf að vera hægt að svara fyrir síðar meir.
Á þessu kjörtímabili hefur Samfylkingin barist fyrir ýmsum málum en eins og gefur að skilja, þá fá minnihlutaflokkar sjaldan óskir sínar uppfylltar. Við höfum oftast reynt að vinna í sátt og samlyndi við aðra bæjarfulltrúa og með því oft uppskorið betur en ella.
Hér eru nokkur mál sem við höfum lagt áherslu á:
- Breytt ferli skipulagsmála þar sem aðgengi íbúa að tillögum og skoðanaskiptum er gert hærra undir höfði.
- Að lýðheilsa sé höfð að leiðarljósi við þéttingu byggðar með góðum útivistarsvæðum fyrir íbúa. Nú síðast með tillögu um ylströnd/heitan pott á Kársnesi.
- Að tryggja að Kópavogsbær nýti öll tækifæri til að minnka losun gróðurhúsalofttegunda og hvetji íbúa og fyrirtæki til hins sama m.a. með tillögu minni um trjáræktarsvæði fyrir almenning og fyrirtæki í upplandinu sem samþykkt var fyrir tveimur árum.
- Að gera íbúum sem eiga erfitt með kaup á húsnæði á opnum markaði kleift að verða sér úti um öruggt húsnæði hvort sem er til leigu eða kaups í samræmi við húsnæðisstefnu Kópavogs.
- Að geta boðið eins árs börnum upp á leikskólapláss. Nú stefnir í óefni vegna fjölgunar barna og engrar fjölgunar leikskólaplássa.
- Að samþætta þjónustu við eldri borgara. Í dag er hún annars vegar á hendi heilsugæslunnar og hins vegar á hendi Kópavogsbæjar. Tillaga Samfylkingarinnar um þetta mál var tekin til greina en hægt gengur að koma þessu í gagnið.
- Að auka íslenskukennslu barna með íslensku sem annað mál. Samfylkingin hefur haldið þessu málefni á lofti í öllum fjárhagáætlunargerðum og fékk samþykkt aukið fjármagn í málaflokkinn fyrir þremur árum.
- Að gera gögn um rekstur bæjarins aðgengilegri fyrir bæjarfulltrúa sem eru eftirlitsaðilar með rekstri bæjarins og bjóða bæjarbúum upp á betri upplýsingar um reksturinn.
Þessi mál ásamt mörgum fleirum þurfa okkar stuðning áfram og til þess bíð ég fram krafta mína á komandi kjörtímabili. Ég vona að ég fái að halda áfram að vinna að betra bæjarfélagi í samvinnu við bæjarbúa og aðra ráðsmenn bæjarins.“
