RIFF kvikmyndahátíð mun í samstarfi við Smáralind þann 26. september næstkomandi bjóða upp á bílabíó á bílaplaninu við 1. hæð Smáralindar.
Hátíðin verður með metnaðarfulla dagskrá í Kópavogi dagana 25. september til 5. október og verður bílabíóið einn stærsti viðburðurinn.
Bílabíóin áttu blómatíma sinn í lok 6. áratugarins og í upphafi þess 7. Ungt barnafólk flykktist á sýningar enda hægt að huga krökkunum á sama tíma og þá voru þau einstaklega vinsæl meðal ungu kynslóðarinnar, í stefnumótamenningu þess tíma.
Þetta verður í þriðja skipti sem RIFF stendur fyrir bílabíói og hafa ávallt fleiri komist að en vilja. Að þessu sinni verður sýnd gamanmyndin Dumb and Dumber, klassík Farrely-bræðrana frá 1994. Þessi bráðfyndna vegamynd var ein af þeim fyrstu á ferli Jim Carrey og átti þátt í að gera hann að stórstjörnu.
Nú þegar framhaldið er væntanlegt í nóvember er ekki seinna vænna að endurnýja kynnin við þá Harry og Lloyd. Smáralind mun af þessu tilefni koma fyrir sérstöku veitingatjaldi við bílastæðið þar sem gestir geta verslað veitingar.
Þá munu heppnir gestir geta unnið inn miða á framhaldssmyndina með þeim Jim Carrey og Jeff Daniels sem frumsýnd verður í nóvember. Hægt er festa kaup á miða á heimasíðu RIFF, riff.is, og er miðaverð 1000 krónur.
