Vaskar stelpur í fjórða flokki kvenna hjá Breiðablik héldu í keppnisferð til Gautaborgar fyrir skömmu. Þar kepptu þær á Gothia-Cup mótinu sem er það fjölmennasta í heiminum og keppendur koma víðs vegar að. Breiðabliksstelpur fylltu tvö lið og voru mótherjarnir meðal annars frá Svíþjóð og Finnlandi. Í öðrum riðlum voru svo lið frá Þýskalandi Noregi og USA.
Bæði lið stóðu sig með miklum sóma innan sem utan vallar. Liðin fóru bæði upp úr sínum riðli og fengu því aukaleiki. Leikar enduðu þannig eftir hörkumót að lið 2 fór í 32 liða úrslit og laut þar í lægra haldi fyrir hörkuliði Ruddalen frá Svíþjóð 3-1. Lið 1 fór í undanúrslitaleik á móti sterku akademíuliði AIK frá Svíþjóð sem endaði 2-1 fyrir Svía. Lið 1 endaði í þriðja sæti og fór á verðlaunapall.
Frábær árangur á sterku og flottu móti hjá þessum stelpum sem eiga sannarlega framtíðina fyrir sér og er óhætt að segja að bjart sé framundan hjá Breiðablik.
Stór hópur fólks fylgdi stelpunum á mótið; þjálfarar liðstjórar og foreldrar. Eðal blanda af fólki sem gerðu allt sitt til að ná settu marki og skapa minningar.
