Blikar undirbúa sig nú af kappi fyrir einn mikilvægasta leik í sögu knattspyrnudeildar félagsins sem fram fer á Laugardalsvellinum í kvöld klukkan 20. Breiðablik mætir þá Aktobe frá Kasakstan í seinni leiknum í þriðju umferð undankeppni Evrópudeildarinnar.
Bæjarráð Kópavogs kom saman til fundar í morgun og sendi frá sér svohljóðandi ályktun:
„Bæjarráð Kópavogs fagnar árangri Breiðabliks í Evrópudeildinni í knattspyrnu en undrast að ekki hafi verið tekið tillit til óska Breiðabliks um breytt leikjafyrirkomulag. Með því má segja að liðinu hafi verið refsað fyrir góðan árangur.“
Mikið álag hefur verið á Blikum að undanförnu og stíft prógram á milli leikja. Ekki bætir úr skák að lið Aktobe hafnaði að leikurinn færi fram á Kópavogsvelli, heimavelli Breiðabliks, en krafðist að leikið yrði á Laugardalsvelli í flóðljósum. Leikurinn er gríðarega mikilvægur fyrir bæði lið og taugaspennan í hámarki. Það er því mikilvægt að leikmenn finni fyrir stuðningi áhorfenda í kvöld.
