Danspar úr Kópavogi í úrslitum Ísland got talent

Kópavogsbúarnir og dansparið Höskuldur Þór Jónsson og Margrét Hörn Jóhannsdóttir keppa í undanúrslitaþætti Ísland got talent sunnudaginn 6. apríl nk.  Þrátt fyrir að vera einungis 15 ára, hafa þau dansað saman í rúmlega 10 ár.  Þau eru margfaldir Íslandsmeistarar í samkvæmisdönsum og hafa einnig unnið til fjölda verðlauna á erlendum vettvangi.  Á síðasta ári kepptu þau fyrir Íslands hönd á öllum heimsmeistaramótum í sínum aldursflokki Unglingar II.  Um áramótin færðust þau upp í flokk ungmenna og gerðu sér lítið fyrir og unnu Íslandsmeistaratitilinn í Suður-Amerískum dönsum í þeim flokki í janúar.  Síðar á árinu keppa þau fyrir Íslands hönd á heimsmeistaramóti ungmenna, sem fram fer í Moskvu.  Þau stunda dansíþróttina af miklum móð og æfa hjá Dansíþróttafélagi Kópavogs.

Auk samkvæmisdansins hefur Höskuldur hampað Íslandsmeistaratitli í break-dansi og Margrét söng til úrslita í Jólastjörnu Björgvins árið 2012.