Að minnsta kosti tíu jólaseríur á Hálsatorgi í eigu Kópavogsbæjar hafa verið eyðilagðar síðustu daga en tjónið hleypur á tugum þúsunda. Kópavogsbær hefur lagt metnað sinn í að hafa jólalegt í bænum á aðventunni og hefur Hálstatorgið til dæmis aldrei verið jólalegra. Þar hafa ljós verið sett á stuðlabergssúlur, á vegg og á fleiri tré á torginu. Nú virka sumar af þessum seríum hins vegar ekki þar sem búið er að slíta þær í sundur. Öll serían á trénu fyrir framan Gjábakka, félagsheimili eldri borgara, er til dæmis ónýt.
Bærinn biðlar til skemmdarvarga um að finna jólafriðinn í hjarta sínu og láta hér staðar numir. Jólaljósin eigi ekki bara að lýsa upp skammdegið heldur einnig að minna okkur á að jólin eru hátíð ljóss og friðar. Fámennur hópur eigi ekki að skemma jólalastemnninguna fyrir öllum hinum.
Fleiri jólaljós eru nú í Kópavogi en árin á undan og hafa jólaseríur til dæmis verið sett á brýrnar við Hamraborg og Digranesveg. Þá eru ljós á um 27 jólatrjám víða um bæ. Fólk er hvatt til að hafa samband við lögreglu verði það vart við eignarspjöll á jólaljósum bæjarins.
