Eldheitar umræður í bæjarstjórn um starfs- og launakjör bæjarfulltrúa.
„Afsakið orðbragðið, en það er drullu mikið starf að vera bæjarfulltrúi í Kópavogi,“ sagði Elfur Logadóttir, vara bæjarfulltrúi Samfylkingar, við upphaf máls síns á bæjarstjórnarfundi í gær þegar tillaga Ómars Stefánssonar um 100% starfshlutfall bæjarfulltrúa var til umræðu. Elfur flutti tilfinningaþrungna ræðu þar sem hún dró saman ábyrgðina sem lögð er á herðar bæjarfulltrúa, vinnuálag og tímann sem fer í að sinna þessu starfi fyrir bæjarbúa. Í ræðunni sagðist Elfur hafa mikinn metnað fyrir því að mæta undirbúin á fundi, en það taki mikla orku að fylgjast með öllum málum og setja sig inn í þau.
„Þetta er miklu meira en 27% starf. Fyrir utan að sinna pólitískum skyldum þarf að fylgjast með listum, menningu, íþróttum og fleira. Fyrir vikið þá er ekki mikið eftir til að afla upplýsinga og setja sig inn í mál. Ég hef ekki alltaf náð að lesa allt en ég kem aldrei óundirbúinn á fundi. Það á enginn bæjarfulltrúi að vera settur í þá stöðu að vera illa undirbúinn eða óundirbúinn fyrir fundi,“ sagði Elfur sem bætti því við að oft sé boðað til funda með einungis sólarhrings fyrirvara og þarf þá að reiða sig á upplýsingar embættismanna til að setja sig inn í mál.
„Ég kveinka mér ekki undan andvökunætum að lesa gögn sem varða sveitarfélagið mitt. En ég geri mér fyllilega grein fyrir að það sé fáranlegt að halda að starf bæjarfulltrúa í Kópavogi sé bara 27% starf,“ sagði Elfur á bæjarastjórnarfundi í gær og bætti því við að tækifærið til að gera þetta væri núna því ljóst væri að mikil endurnýjun myndi eiga sér stað eftir næstu kosningar og því væru núverandi bæjarfulltrúar ekki að hygla sjálfum sér. „Ef við ætlum að hafa gott fólk til að sinna starfinu sínu vel þá þýðir það hærri laun og hærra starfshlutfall,“ sagði Elfur.
Karen Elísabet Halldórsdóttir, bæjarfulltrúi Sjálfstæðisflokksins, tók undir þetta og sagði þetta mál hafa hafist í nefndinni Betri bragur, sem hún og Pétur Ólafsson, Samfylkingu, hefðu átt sæti í. Markmiðið hafi verið að bæta vinnuna í bæjarstjórn. Umræðan í bæjarstjórn hafi hins vegar farið á hvolf. 27% starfsskylda af þingfarakaupi hafi verið neyðarúrræði til að útskýra laun bæjarfulltrúa í Kópavogi. „Við þurfum einhverntímann að hafa hugrekki til að horfast í augu við bæjarbúa og spyrja: „Hvað finnst ykkur vera í lagi að við vinnum mikið fyrir ykkur?“ Ég þarf að vera tilbúin við símann ef bæjarbúar, starfsmenn, forstöðumenn og fleiri þurfa á mér að halda og ég geri það auðvitað. En gerir fólk sér almennt grein fyrir hvað þetta er mikil vinna? Til að ég vinni þetta nægilega vel þá tek ég tímann frá annarri vinnu eða fjölskyldu,“ sagði Karen sem lagði það til að óháður aðili yrði fenginn til að meta starfskjör bæjarfulltrúa.
Ármann Kr. Ólafsson, bæjarstjóri, kvaddi sér hljóðs og sagðist vera andvígur því að bæjarfulltrúar væru að ákveða sjálfir launin sín. Betra væri ef launakjör bæjarfulltrúa væru ákveðin af öðrum, til dæmis hjá Samtökum sveitarfélaga. „Það var einfaldari heimur þegar ég byrjaði í pólitík. Skólamál og málefni fatlaðra eru tiltölulega flóknir, viðkvæmir og mikilvægir málaflokkar,“ sagði Ármann og bætti því við að það væru kjaradeilur í landinu núna og samningar framundan. Því vildi hann setja spurningamerki við tímasetningu tillögunnar núna. „Ég minni á það að þegar við lækkuðum okkur sjálf í launum gagnvart þingfarakaupinu, og fórum síðan aftur upp í það, þá var það túlkað algjörlega okkur í óhag. Síðan kom fréttin í dag um 270% launahækkun. Það finnst fjölmiðlum spennandi,“ sagði Ármann Kr. Ólafsson, bæjarstjóri.
Tillögu Ómars var vísað til forsætisnefndar Kópavogs.
