Hæstiréttur hefur snúið við dómi héraðsdóms Reykjaness frá því í byrjun nóvember er varðar þinglýsingar á Vatsenda og úrskurðað að dánarbú Sigurðar Hjaltested sé þinglýstur eigandi Vatnsenda en ekki Þorsteinn Hjaltested. Sýslumanninum í Kópavogi beri því að færa heiti dánarbús Sigurðar Hjaltested sem eiganda í fasteignabók fyrir jörðina Vatnsenda. Dómurinn er endanlegur.
Ármann Kr. Ólafsson, bæjarstjóri Kópavogs, hefur sagt að Kópavogsbær hafi ekki brotið neina samninga og að bærinn hafi verið í góðri trú.
-Hver er vilji Kópavogsbæjar í þessu máli og hvar stendur hann? Eiga erfingjar að dánarbúi Sigurðar K. Lárussonar Hjaltested kröfu á Kópavogsbæ?
„Eins og ég kom inn á hér að framan þá hefur bærinn ekki brotið neina samninga. Hvað varðar deilur erfingja, þá voru viðskipti bæjarins á sínum tíma við þinglýstan eiganda og var Kópavogsbær þar í góðri trú,“ sagði Ármann Kr. Ólafsson, bæjarstjóri, í samtali við Kópavogsfréttir í haust.
Pétur Ólafsson, bæjarfulltrúi Samfylkingar, segir málinu ekki lokið.
„Málinu virðist hvergi nærri lokið, það á í raun ennþá eftir að úthluta verðmætum úr dánarbúinu til lögerfingja. Lengi hefur staðið ágreiningur um eignarhald á Vatnenda en ég leyfi mér að halda því til haga að bæjarfulltrúar
Samfylkingarinnar mótmæltu eignarnámi bæjarins á öllum stigum málsins. Meðal annars vegna þess að eignarhald á jörðinni hefur alltaf verið í besta falli óljóst og þar með gæti bærinn fengið á sig háar skaðabótakröfur með eignarnáminu,“ segir Pétur Ólafsson, bæjarfulltrúi Samfylkingar í Kópavogi.
