Fjárhagsáætlun Kópavogs fyrir árið 2016 var samþykkt með öllum greiddum atkvæðum á fundi bæjarstjórnar síðdegis í dag.
Í bókun bæjarstjórnar segir: „Fjárhagsáætlun Kópavogs er nú gerð í samvinnu allra bæjarfulltrúa. Þessi samvinna undirstrikar sameiginlega ábyrgð allra bæjarfulltrúa á rekstri bæjarins. Ákvörðun um samvinnu við áætlunina var samþykkt í bæjarstjórn. Niðurstaðan sýnir að samstarf sem þetta er farsælt fyrir bæinn og bæjarbúa. Í slíkri samvinnu þurfa allir að gefa eitthvað eftir og lokaniðurstaðan endurspeglar það. Bæjarstjórn þakkar starfsfólki bæjarins fyrir vandaða vinnu við gerð áætlunarinnar.“
Í fjárhagsáætluninni kemur fram að A-hluti bæjarsjóðs verður rekinn með 102,7 milljóna rekstrarafgangi og þá verður samstæða Kópavogsbæjar rekin með 257,3 milljón króna rekstrarafgangi á næsta ári. Fjórða árið í röð lækka fasteignaskattar og útsvar er áfram undir leyfilegu hámarki.
Skuldahlutafall bæjarins lækkar umtalsvert á næsta ári og hraðar en aðlögunaráætlun gerir ráð fyrir, samkvæmt áætluninni verður það komið niður í 155,5% í árslok 2016.
