Næstbestiflokkurinn er ekki stjórnmálaflokkur í venjulegum skilningi þess hugtaks. Við erum vettvangur fyrir íbúa til að koma sjónarmiðum sínum á framfæri. Við erum einstaklingar með ólíkar lífsskoðanir, höfum engin bein hagsmunatengsl við fyrirtæki eða félagasamtök innan bæjarins með það eitt að markmiði að taka skynsamlegar ákvarðanir í ljósi bestu upplýsinga með hagsmuni allra Kópavogsbúa að leiðarljósi.
Næstbestiflokkurinn hefur engan formann né framkvæmdastjóra eða starfsmann.
Næstbesti heldur engar skrár yfir félaga, stuðningsfólk eða kjósendur.
Næstbesti hefur engar tekjur af félagsgjöldum.
Næstbesti hefur ekki þegið neinar peningagreiðslur frá fyrirtækjum eða einstaklingum á yfirstandandi kjörtímabili.
Einu tekjur Næstbesta er árleg greiðsla frá Kópavogsbæ lögum samkvæmt sem nemur í ár um 350.000 kr. og er alla jafna um 700.000. Þessi upphæð miðast við niðurstöður síðustu kosninga en í þeim hlaut Næstbestiflokkurinn 1901 atkvæði u.þ.b. 14% greiddra atkvæða.
Þeir peningar renna allir til starfsemi Næstbestaflokksins.
Í komandi kosningagleði höfum við einsett okkur að eyða sem allra minnstum fjármunum og kynna okkar stefnumál á sem ódýrastan máta. Við treystum Kópavogsbúum til þess að taka skynsamlega ákvörðun í kjörklefanum 31. maí.
-Hjálmar Hjálmarsson, oddviti Næstbestaflokksins í Kópavogi.
