Flottur sigur hjá Blika stelpum.

Auðun Georg Ólafsson

15/06/2013

Breiðablik sigraði ÍBV með þremur mörkum gegn einu á Kópavogsvelli í kvöld, en Blikar voru töluvert sterkari aðilinn í leiknum.

Heimaliðið byrjaði leikinn betur og sótti mikið fyrstu fimmtán mínúturnar, en þá byrjaði liðið að síga niður á völlinn og þá fór Shaneka Gordon af stað. Hún hafði komið sér í nokkur álitleg færi áður en hún kom ÍBV yfir á 23. mínútu.

Þórhildur Ólafsdóttir átti þá sendingu inn fyrir vörnina og Shaneka nýtti sér það með því að klára vel fram hjá Mist í markinu. ÍBV átti frábæran tíu mínútna kafla í fyrri hálfleik, en eftir það var lítið að frétta.

Rosie Sutton setti boltann í eigið net, en þá átti Rakel Hönnudóttir fyrirgjöf sem Sutton skallaði framhjá Bryndísi í markið. Rakel kom Blikum svo yfir undir lok fyrri hálfleiks, en Hlín Gunnlaugsdóttir átti þá fyrirgjöf sem Rakel lagði fyrir sig og skoraði. Rakel virtist hafa lagt boltann fyrir sig með hönd, en erfitt var að sjá atvikið.

Eftir mikla baráttu í seinni hálfleik og mörg góð færi Blika þá komst liðið í 3-1. Ingibjörg Sigurðardóttir hafði þá komið inn á sem varamaður. Hún átti flottan bolta inn í teig og þar var Berglind Björg Þorvaldsdóttir mætt og skoraði hún örugglega.

Lokatölur 3-1 á Kópavogsvelli. Breiðablik áfram í öðru sæti með 18 stig á meðan ÍBV er í þriðja sæti með 13 stig.