Fulltrúar Sjálfstæðisflokks og Framsóknarflokks í Kópavogi hafa rætt saman síðustu daga og farið yfir áherslur flokkanna. Þetta kemur fram í sameiginlegri tilkynningu Ásdísar Kristjánsdóttur, oddvita Sjálfstæðisflokksins og Orra Vignis Hlöðverssonar, oddvita Framsóknarflokksins.
„Samhljómur er milli flokkanna um verkefni næstu ára og var því ákveðið í dag að hefja formlegar viðræður um myndun meirihluta. Framundan er vinna við að skrifa málefnasamning, móta áherslur og skilgreina verkefni næstu ára. Við gerum okkur væntingar um að vinnan muni ganga hratt og örugglega fyrir sig,“ segir í tilkynningu oddvita Framsóknarflokks og Sjálfstæðisflokks í Kópavogi.
