„Forsenda þverpólitískrar nefndar í bænum um húsnæðismál virðist brostin,“ segir formaður bæjarráðs.

Rannveig Ásgeirsdóttir, formaður bæjarráðs Kópavogs.
Rannveig Ásgeirsdóttir, formaður bæjarráðs Kópavogs.
Mynd: Fréttablaðið/Stefán Karlsson.

Bæjarstjórn Kópavogs samþykkti í gærkvöldi að kaupa nú þegar 30-40 íbúðir í bænum og byggja tvær blokkir til að mæta neyðarvanda þeirra sem þurfa á félagslegum úrræðum að halda í húsnæðismálum. Tillagan var borin upp af minnihlutanum og náði í gegn með stuðningi Gunnars Birgissonar, fyrrverandi bæjarstjóra, gegn atkvæðum meirihlutans. Rannveig Ásgeirsdóttir, formaður bæjarráðs segir þetta furðumál. „Tillaga kom fram í byrjun fundar og því óundirbúið mál, engin greinargerð, ekkert mat. Bæjarstjóri óskaði eftir frestun á málinu til þess að fá mat félagsmálaráðs og fjármála-og hagsýslustjóra á tillögunni en menn sinntu því engu og kusu á móti þeirri tillögu. Það er afskaplega furðulegt að menn vilji ekki sjá verðmiðann á tillögunni. Þeir sem töldu sig geta sýnt fram á betri fjármálastjórnun en aðrir fyrir nokkrum misserum og lögðu til niðurskurð í mennta- og félagslega geiranum, demba sér nú blint í fjárfestingu án umhugsunar og eru svo að klóra í bakkann með því að nefna til sögunnar einhverja samstarfsaðila sem enginn hefur umboð til að nefna.“

Rannveig segir að fyrir áramót hafi þverpólitísk nefnd allra flokka hafið störf meðal annars til að finna lausnir á neyðarvanda í félagslega húsnæðiskerfinu, en ekki síður að fá heildarniðurstöðu fyrir húsnæðismarkað í Kópavogi. Einnig átti að skoða lausnir ríkisstjórnarinnar þar sem liggja margar spurningar um hvernig  gera á fólki kleift að eiga eða leigja húsnæði. Fyrir nefndinni hafi legið svipuð tillaga sem Gunnar Birgisson lagði fram fyrir áramót og bæjarstjórn samþykkti til afgreiðslu fyrrgreindrar nefndar.

„Góður andi var í nefndinni og verið var að vinna gögn fyrir okkur sem átti að leggja fram í þessum mánuði. Þetta hefur verið í anda þess sem ég hef kallað „nýja pólitíkin,“ þar sem flokkar eiga heilbrigt samstarf um velferð íbúanna. Nú er svo komið að nokkrir flokkar hafa rofið þetta samstarf með því að kljúfa hluta málsins frá og farið sína eigin leið í lýðskruminu rétt fyrir kosningar. Þetta veit ekki á gott. Forsenda samstarfs í þessari nefnd virðist brostin,“ segir Rannveig Ásgeirsdóttir, formaður bæjarráðs.

Deildu:

Facebook
Twitter
Pinterest
LinkedIn

Fleiri fréttir

Stórskemmtileg leiksýning fyrir yngstu kynslóðina

Leikfélag Kópavogs sýnir um þessar mundir barnaleikritið Ferðin til Limbó eftir Ingibjörgu Jónsdóttur (1953-1986) sem sett var upp í Þjóðleikhúsinu í janúar 1966. Leikritið byggir á barnabókinni Músabörn í geimflugi eftir sama

Er svefn besta verkjalyfið?

Svefn er ein af grunnstoðum góðrar heilsu ásamt góðri næringu, hreyfingu og vellíðan. Þegar við sofum notar líkaminn tímann til að endurnýja sig og undirbúa okkur fyrir næsta dag. Svefn