4 flokkur Breiðabliksstráka á yngra ári (sem fæddir eru árið 2000) gerði gott mót á Ray Cup mótinu á dögunum. Eldra árið, 1999, voru erlendis til að taka þátt í Dana Cup. Tvö lið 4 flokks kepptu Rey Cup sem skráð voru til leiks í keppni A- og C-liða. Bæði lið stóðu sig gríðarlega vel í erfiðri keppni þar sem ekkert var gefið eftir. A-liðið tapaði ekki leik og vann sinn riðil með fullt hús stiga. Þeir léku svo við ÍBV í undanúrslitum og unnu 1-0 sem þýddi að þeir léku á Laugardalsvelli til úrslita A liða við Keflavík sem þeir gerðu jafntefli við í riðlakeppninni.
Athygli vakti að strákarnir skyldu ná í úrslit A liða í ljósi þess að þeir væru allir á yngra ári. Þeir börðust eins og ljón í úrslitaleiknum en voru nokkuð yfirspenntir yfir því að fá að spila á aðalleikvangi Laugardalsvallar og að komast í úrslit. Þeir töpuðu, naumlega, 1-0 fyrir Keflavík sem átti betri dag en samt sem áður er þetta frábær árangur hjá strákunum.
C-liðið stóð sig einnig vel og endaði í 3ja sæti í sínum riðli. Þeir spiluðu svo við Fylki um 5-6 sæti sem þeir töpuðu 2-0.
Að öllu leyti frábært Rey Cup mót hjá strákunum á yngra ári í fjórða flokki Breiðabliks.
