Yngri en átján ára fá frítt í sund í Kópavogi frá og með áramótum 2018/19. Ákvörðunin var samþykkt af bæjarstjórn Kópavogs í tengslum við gerð fjárhagsáætlunar ársins 2019. Frítt verður í sund fram að átján ára afmælisdegi en undanfarin ár hefur aðgangur í sund verið án endurgjalds fyrir yngri en 10 ára. Þá er sund fyrir eldri borgara án endurgjalds.
„Okkur er sönn ánægja að bjóða átján ára og yngri frítt í sund, það fellur vel að áherslum bæjarins á fjölskyldu- og lýðheilsumál,“ segir Ármann Kr. Ólafsson bæjarstjóri Kópavogs í tilkynningu.
Í Kópavogi eru tvær sundlaugar sem opnar eru almenningi, Sundlaug Kópavogs og Salalaug. Þær eru báðar með vinsælustu laugum landsins, en samanlagður heimsóknarfjöldi hefur verið um 900 þúsund á ári undanfarin ár.
