Fyrsti fundur bæjarstjórnar og bæjarráðs

Ný bæjarstjórn Kópavogs fundaði í vikunni í fyrsta sinn. Á þessum fyrsta fundi  var Ármann Kr. Ólafsson ráðinn bæjarstjóri, Margrét Friðriksdóttir var kjörinn forseti bæjarstjórnar og Theódóra Þorsteinsdóttir var kjörinn formaður bæjarráðs.

Á fundinum var kynntur nýr málefnasamningur nýs meirihluta Bjartrar framtíðar og Sjálfstæðisflokks en hann má nálgast hér á heimasíðu Kópavogsbæjar, www.kopavogur.is.

Ellefu sitja í bæjarstjórn Kópavogs, þeir sem náðu kjöri í sveitarstjórnarkosningunum 31. maí eru:

Sverrir Óskarsson og Theódóra Þorsteinsdóttir, Bjartri framtíð.

Ármann Kr. Ólafsson, Guðmunur Geirdal, Hjördís Ýr Johnson, Karen E. Halldórsdóttir, Margrét Friðriksdóttir, Sjálfstæðisflokki,

Birkir Jón Jónsson, Framsóknarflokki.

Ása Richardsdóttir og Pétur Hrafn Sigurðsson, Samfylkingu.

Ólafur Þór Gunnarsson, Vinstri grænum og félagshyggjufólki.

Þess má geta að fyrir utan Ármann og Ólaf Þór eru allir bæjarfulltrúar nýir í bæjarstjórn Kópavogs.

Theodóra S. Þorsteinsdóttir hefur tekið við lyklavöldum að skrifstofu formanns bæjarráðs í Kópavogi í dag. Það var fráfarandi formaður bæjarráðs, Rannveig Ásgeirsdóttir, sem afhenti Theodóru lyklana.

Theodóra stýrði einnig sínum fyrsta fundi sem formaður bæjarráðs í morgun. Í bæjarráði Kópavogs sitja auk Theodóru, sem er í Bjartri framtíð, Karen E. Halldórsdóttir og Hjördís Ýr Johnson Sjálfstæðisflokki,  Ólafur Þór Gunnarsson Vinstri grænum og Pétur Hrafn Sigurðsson Samfylkingu. Þá situr bæjarstjóri, Ármann Kr. Ólafsson, fundina án atkvæðisréttar, og Birkir Jón Jónsson, Framsóknarflokki, er áheyrnarfulltrúi.

„Það eru mörg spennandi verkefni framundan í Kópavogi og mér líst vel á starfið og fólkið sem vinnur með mér,“ segir Theodóra.

Þess má geta að Theodóra er þriðja konan í röð sem gegnir formennsku í bæjarráði í Kópavogi, hún tekur við af Rannveigu sem tók við af Guðríði Arnardóttur. Þá er meirihluti bæjarráðs Kópavogs skipaður konum í fyrsta sinn.