Gagnvirk vísindasýning í Smáralind

ritstjorn

15/10/2013

Stórskemmtileg sýning hófst í Smáralind í dag sem ber heitið Vatn – Hið fljótandi Undur.

Vísindasýningin er fyrir börn og fullorðna.

Sýningin er framhald af sýningunni Undur vísindanna sem sett var upp í Smáralind í febrúar síðastliðnum en í þetta sinn er þema sýningarinnar vatn.

Tilgangur sýningarinnar er að fræða fólk og leyfa því að kynnast á eigin forsendum áður óþekktum tengslum og áhrifum vatns. Eðlisfræðin er með þessu móti sett upp á einfaldan og skemmtilegan hátt fyrir alla aldurshópa til fróðleiks og skemmtunar.

Meðal þess sem gestir munu kynnast er yfirborðsspenna vatns, hvernig vatn býr til form og hreyfing vatns. Á sýningunni fá gestir að skemmta sér og gera uppgötvanir upp á eigin spýtur, enda er það þannig sem þekking verður til.

Sýningin kemur frá Þýskalandi og er sérstaklega gerð fyrir verslunarmiðstöðvar. Undir slagorðinu „Science on Tour“ er ferðast með sýninguna á milli landa og hún sett upp á fjölförnum stöðum til þess að sem flestir fái tækifæri til að prófa og kynnast ótrúlegum og heillandi fyrirbærum úr heimi vísindanna. En þetta er ekki sýning þar sem gestum er bannað að snerta heldur verða þeir þvert á móti hvattir til að snerta.

Sýningin stendur yfir dagana 15. – 29. október.