Gallerí Portið opnar með glæsilegri samsýningu.

ritstjorn

04/09/2014

Nýtt gallerí, Gallerí Portið, verður opnað í dag, fimmtudaginn 4. september, klukkan 18:00 með stórri samsýningu rúmlega tuttugu listamanna þar sem áhersla er lögð á fjölbreytileika. Á sýningunni er teflt saman þjóðþekktum núlifandi listamönnum og goðsögnum íslenskrar listasögu í bland við aðrar minna þekktar listaspírur á öllum aldri.

Gallerí Portið opnar með glæsilegri samsýningu.

Galleríið er staðsett í portinu þar sem Toyota hafði áður aðstöðu á Nýbýlaveginum þar sem fjöldi fyrirtækja hefur nú komið sér fyrir. Salurinn sem galleríið hefur til umráða er um 600 fermetrar.

Segja má að sýningin skiptist í þrjá meginflokka: það eru listamenn sem standa að Anarkíu listasal, verk í einkaeigu og síðan samsafn ólíkra listamann sem hafa verið virkir í listalífi landsins síðstu ár og áratugi. Hugmyndin er að gefa breiða sýn á fjölbreytta flóru íslenskrar myndlistar. Eitt af einkennum íslensks myndlistarheims er hve hann virðist margskiptur: tilteknir listamenn eru þekktir innan ákveðins þjóðfélagshóps þótt aðrir listamenn séu þar lítt kunnir – en þeir eru þá ef til vill vel þekktir hjá öðrum.

Tilgangur sýningarinnar er meðal annars að brúa þetta bil. Það hefur ávallt verið tilgangur Anarkíu að losa listina undan hverskyns mælstikum listræns rétttrúnaðar og virða sérvisku hvers og eins, hvort sem um er að ræða geranda í listum eða áhorfanda.

Eftirtaldir listamenn verða með verk á sýningunni:
Jón Óskar, Hulda Hákon, Sigurbjörn Jónsson, Kristján Jónsson, Jóhann Ludwig Torfason, Ragnhildur Jóhannsdóttir, Erling Kingenberg, Kristinn Már Pálmason, Ómar Stefánsson, Daníel Magnússon, Erla Þórarinsdóttir, Anarkía, Anna Hanson, Elísabet Hákonardóttir, Guðmunda Kristinsdóttir, Guðlaug FriðriksDóttir, Kristín Tryggvadóttir, Finnbogi Helgason, Aðalsteinn Eyþórsson, Ásta R Ólafsdóttir, Ragnheiður Guðmundsdóttir, Jóhanna Þórhallsdóttir, Hrönn Björnsdóttir, Hanna Pálsdóttir, Helga Ástvaldsdóttir, Þorgeir Helgason, Bjarni Sigurbjörnsson og fleiri. Sýnd verða einnig verk eftir gömlu meistarana; Ásgrím Jónsson, Eirík Smith, Jóhannes Kjarval, Gunnlaug Blöndal, Svavar Guðnason, Flóka, Stórval og fleiri.

Sjá nánar hér á Facebook síðu.

Undirbúningur er í fullum gangi fyrir samsýninguna.