Málefni grunnskólanna snertir okkur öll. Þeir eru vinnustaðir barnanna okkar og móta og undirbúa þau fyrir lífið. Grunnskólar Kópavogs eru mjög öflugir. Mikilvægur þáttur í að viðhalda og efla gæði þeirra er stöðug umræða, jákvæð og uppbyggjandi gagnrýni ásamt samvinnu bæjaryfirvalda, starfsfólki skólanna og foreldra.
Fjölbreytileiki og sérhæfing
Börnin okkar eru ólík og hafa mismunandi þarfir og skólastarfið þarf að geta tekið mið af því. Með því að auka faglegt og fjárhagslegt sjálfstæði skólanna eykst svigrúm til þróunarstarfs og fjölbreytileika. Hver og einn skóli hefur þá tækifæri til að fara ólíkar leiðir í rekstri og getur jafnvel sérhæft sig á ákveðnu sviði. Þannig aukum við líkurnar á að nemendur fái tækifæri til að finna sína styrkleika og efla þá. Það er lykilþáttur í því að byggja upp sterka og jákvæða sjálfsmynd sem er ein af sterkustu forvörnunum.
Læsi í víðum skilningi
Upplýsingatækni gegnir veigamiklu hlutverki í samfélaginu og grunnskólar Kópavogs eiga að vera í fremstu röð með að nýta hana í daglegu starfi nemenda og kennara. Fjölbreytni í námsgögnum þjálfar nemendur í að nota upplýsingatækni og þannig eflist læsi nemenda í víðum skilningi. Auðveldara er að bjóða uppá einstaklingsmiðuð verkefni á sviði upplýsingatækni og þannig höfða til áhugasviðs og þarfa nemandans.
Markmið okkar allra
Menntun er einn mikilvægasti hlekkurinn í lífi barna okkar. Í skólakerfinu verður því að vera svigrúm til þess að ólíkir einstaklingar fái að vaxa og dafna. Með því að auka fjárhagslegt sjálfstæði skólanna skapast tækifæri til þess að höfða til breiðari hóps námsmanna. Skólastarf sem tekur mið af þroska og hæfni nemenda skilar okkur sterkum einstaklingum sem eru betur í stakk búnir til að takast á við framhaldsnám og atvinnulífið.
Áfram grunnskólar Kópavogs!
–Hjördís Ýr Johnson, skipar 4. sæti á lista Sjálfstæðisflokksins í Kópavogi
