Úrslit kosninganna í Kópavogi liggja nú fyrir eftir stutta og frekar daufa kosningabaráttu. Hún stóð yfir í rétt rúman hálfan mánuð. Sjálfstæðisflokkurinn vinnur á og fjölgar um einn bæjarfulltrúa en Samfylkingin tapar fylgi og jafnframt einum bæjarfulltrúa. Það eru meðal annars mestu tíðindin í þessum kosningum. Framboð Hjálmars Hjálmarssonar, leikara, fékk ekki hljómgrunn í þetta skipti og Píratar eða Dögun ná ekki inn manni og lítið um það að segja. Framboð Vinstri grænna og félagshyggju stóð í stað, hvorki sigur né tap.
Tvö önnur framboð unnu líka sigur, Framsóknarflokkurinn og svo hið nýja framboð Björt framtíð. Ekki er gott að meta hvort að aukið fylgi Framsóknarflokksins sé tilkomið vegna rasisma eða hvort að Birkir Jón Jónsson eigi eitthvað í þessari fylgisaukningu.
Það einkennilega er að Björt framtíð fær tvo menn. Hér er sama fólk og sat á Y listanum sem ætlaði að hreinsa til fyrir fjórum árum en gerði þveröfugt á við það loforð. Þau skiptu bara um kennitölu, líkt og margir víkingar gera sem kenndir eru við útrás, og buðu fram undir nýjum bókstaf. Það trix er orðið viðurkennt og ekki hægt að skammast lengi yfir því. Það sem vekur mesta furðu er að þetta framboð hafði engin stefnumál. Nú þegar það er orðið ljóst að Sjálfstæðisflokkurinn og Björt framtíð ætla að mynda meirihluta þá hlýtur það að vera um stefnu Sjálfstæðisflokksins. Sá flokkur hefur jú stefnu sem ætti að vera mögulegt að vinna út frá. Kjósendur höfðu enga hugmynd um það fyrir kosningar hvaða stefnu Björt framtíð var með en þeim verður það ljóst á næstu dögum þegar að málefnaskrá Sjálfstæðisflokksins verður lögð fram sem málefnaskrá hjá nýjum meirihluta. Það má þó ekki taka það af Bjartri framtíð að þau lofuðu því að tala við fólk og ætluðu að vinna samkvæmt þeim samtölum að ýmsum málum, þeim láðist bara að geta þess að fólkið sem þau ætluðu að tala við var fólkið í Sjálfstæðisflokknum.
Það er umhugsunarefni fyrir félagshyggjufólk hvernig skipting bæjarfulltrúa í Kópavogi er orðin, þrír flokkar, Sjálfstæðiflokkurinn, Björt framtíð og Framsóknarflokkurinn eru efnishyggjuflokkar með samtals 8 bæjarfulltrúa. En tveir vinstra megin og við miðju, Samfylkingin og Vinstri grænir og félagshyggjufólk með samtals 3 bæjarfulltrúa.
