Listamenn og ráðstefnuhaldarar í Hörpunni mega ekki ráða sjálfir hvaða hljóð- og ljósakerfi þeir vilja nota. Þetta er ólöglegt og samkeppnishamlandi, að mati Ingolfs Arnarsonar, framkvæmdastjóra hjá HljóðX, sem hefur sent formlega kvörtun um starfshætti Hörpunnar til samkeppnisyfirvalda fyrir brot á samkeppnislögum.
Fyrirtækið HljóðX sérhæfir sig í uppsetningu tæknibúnaðar fyrir tónleika, ráðstefnur, vörusýningar og fleira. Það hefur einnig séð um hljóð- og ljósakerfi í mörgum af helstu fyrirtækjum landsins.
Ingólfur segir Hörpuna nýta sér markaðsráðandi stöðu. „Harpan fer ekki eftir eðlilegum reglum. Listamenn mega ekki ráða sjálfir hvaða hljóðkerfi þeir nota. Þeir þurfa að leigja búnað af Hörpunni en mega ekki leigja af þriðja aðila. Eins og allir vita þá eru listamenn margir hverjir með margar sérþarfir varðandi hljóðfæri, míkrafóna og hljóðkerfi. En í Hörpunni er eins og að það megi bara nota „ríkishljóðkerfið“ svolítið svipað og að fiðluleikarar í Sinfoníuhljómsveit Íslands mættu bara nota „ríkisfiðluna,“ eða eitthvað annað álíka fáránlegt. Það er nákvæmlega ekkert heilbrigt við þetta umhverfi í Hörpunni,“ segir Ingólfur og bætir því að það kæmi sér verulega á óvart ef Samkeppniseftirlitið hjóli ekki í málið og setji í framhaldinu eðlilegar starfsreglur sem hægt verði að fara eftir. „Þetta rekstrarumhverfi sem Harpan er að búa til er algjörlega óásættanlegt,“ segir Ingólfur Arnarson, framkvæmdastjóri hjá HljóðX.
Halldór Guðmundsson, forstjóri Hörpu, segist vita af kvörtun frá HljóðX en segir málflutning þeirra ósangjarnan: „Á sínum tíma, áður en ég kom til starfa, var haldið hér útboð þegar keypt var hljóðkerfi inn í húsið. Exton varð fyrir valinu. Allt var ákveðið samkvæmt útboði, einnig veitingasalan. Samkeppniseftirlitið hefur málið til meðferðar en okkur ber skylda til að fara eftir því sem ákveðið var í útboði.“
