Haldið verður upp á 30 ára afmæli Barnasáttmála Sameinuðu þjóðanna með pompi og prakt í Kópavogi miðvikudaginn 20. nóvember. Stór hluti barna bæjarins tekur þátt í viðamikilli dagskrá sem fram fer í Menningarhúsunum í Kópavogi frá kl. 9 til 13. Í dagskránni er áhersla lögð á umhverfis- og loftslagsmál, frið, réttindi og þátttöku barna í samfélaginu.
Þá opnar sýning á verkum leikskólabarna í Smáralind síðdegis þar sem birtist túlkun barna á Barnasáttmálanum og loks dansa unglingar úr Kópavogi fyrir réttindum í félagsmiðstöðinni Þebu.
Kópavogsbær er að innleiða Barnasáttmála SÞ og því vel við hæfi að fagna afmælinu með glæsibrag.
Dagskrá dagsins er unnin í samvinnu skóla bæjarins og Menningarhúsanna í Kópavogi.
Nánar um dagskrá:
Salurinn kl. 9: Dagskráin hefst þegar sýningin Friður verður opnuð í Salnum. Sýningin er unnin af börnum á leikskólanum Rjúpnahæð og byggir á túlkun barnanna á friði. Hún var unnin út frá stefnu leikskólans sem byggist á sjálfræði með lýðræði að leiðarljósi. Í leikskólanum er áhersla lögð á að hlusta á raddir og sjónarmið barna, sem er í fullu samræmi við Barnasáttmálann.
Við opnun sýningarinnar verður Friðarlagið flutt af elstu börnum leikskólanna Rjúpnahæðar, Urðarhóls, Grænatúns, Kópasteins, Austurkórs og Álfaheiðar. Friðarlagið var samið sérstaklega í tengslum við sýninguna, lagið er eftir Hjört Jóhannsson og texti eftir Kristján Hreinsson.
Friðarsýningin stendur til 24. nóvember.
Náttúrufræðistofa kl. 10: Börn úr 8. bekk í Kópavogi sýninguna Pláneta A á Náttúrufræðistofu Kópavogs ásamt Ármanni Kr. Ólafssyni bæjarstjóra Kópavogs, Andra Snæ Magnasyni rithöfundi og Sævari Helga Bragasyni, Stjörnu-Sævari. Í allt haust hefur nemendum í 8. bekk í Kópavogi verið boðið á fyrirlestra og umræður með Sævari Helga og unnið í kjölfarið fjölbreytt verkefni tengd umhverfis- og loftslagsmálum. Með verkefninu er lögð áhersla á að raddir unglinganna heyrist og þeirra skoðanir komist á framfæri.
Sýningin stendur til 27. nóvember.
Salurinn kl. 10.30: 200 börn úr 5. bekk í skólum Kópavogs halda málþingiðKrakkaveldi þar sem þau bjóða börnum og fullorðnum til fundar við sig og kynna sínar hugmyndir um hvernig Ísland verður þegar þau fá loks að ráða. Salvör Gullbrá Þórarinsdóttir hefur þróað Krakkaveldi með það að markmiða að valdefla börn og velta upp spurningum um lýðræði og vald barna til að hafa áhrif í samfélaginu.
Salurinn kl. 12.15: Skólahljómsveit Kópavogs heldur tónleika í Salnum. Skólahljómsveitin hefur í haust tengt tónlist við Barnasáttmálann og Heimsmarkmið Sameinuðu þjóðanna um sjálfbæra þróun. Á tónleikunum segja meðlimir A og B sveitar hljómsveitarinnar frá lögunum, hvernig þeir upplifa tónlistina og hvaða skilaboðum þeir vilja koma áleiðis með sínum tónlistarflutningi. Stjórnendur Össur Geirsson og Jóhann Björn Ævarsson.
Tónleikar Skólahljómsveitarinnar eru öllum opnir á meðan húsrúm leyfir og hluti af viðburðaröðinni Menning á miðvikudögum.
Allan daginn verða smiðjur og viðburðir í gangi í Menningarhúsunum í Kópavogi. Bænafána-, hamingju- og póstkortasmiðjur verða í fullum gangi í Gerðarsafni, Náttúrufræðistofu og á Bókasafni ásamt friðarkrakkajóga, sögustund og dansi. Einnig gefst börnum kostur á að koma með tillögur um hvernig bæta á Mælaborð barna sem þróað hefur verið til þess að fylgjast með lífsgæðum barna í Kópavogi.
Smáralind kl. 17: Sýning á teikningum leikskólabarna í Kópavogi opnar í Smáralind. Verkin á sýningunni eru túlkun barna á hinum ýmsu greinum Barnasáttmálans.
Sýningin í Smáralind stendur til 24. nóvember.
Félagsmiðstöðin Þeba kl. 19.30: Deginum lýkur með því að unglingar dansa fyrir réttindum barna í félagsmiðstöðinni Þebu. DJ Dóra Júlía sér um tónlistina.