Gríðarleg aukning er á tíðni lífsstílssjúkdóma og árlega má rekja allt að 63% dauðsfalla í heiminum til þeirra. Alþjóðaheilbrigðismálastofnunin (WHO) spáir frekari aukningu á komandi árum. WHO hvetur yfirvöld til aðgerða og fólk til ábyrgðar hvað varðar heilsutengda hegðun og bendir á fjóra aðaláhættuþætti lífsstílssjúkdóma sem eru hreyfingaleysi, óhollt mataræði, reykingar og áfengisneysla. Kópavogur hefur alla burði til að vera í farabroddi hvað varðar heilsueflingu bæjarbúa og starfsfólks en betur má ef duga skal.
Mikilvægi hreyfingar alla ævi
Að vera virkur í daglegu lífi alla ævi og fá tækifæri til þess skiptir öllu máli þar sem þrekleysi hefur meiri áhrif á lífslíkur okkar en offita, reykingar og sykursýki til samans. Viðmið WHO um daglega hreyfingu eru að börn og unglingar eigi að vera líkamlega virk í minnst 60 mínútur daglega og fullorðnir í minnst 30 mínútur. Er þeim viðmiðum fylgt í starfi á vegum bæjarins?
Tryggja þarf góða aðstöðu á leikskólum, skólum og í dægradvöl og kanna þann möguleika að nýta íþróttamannvirki betur yfir daginn fyrir fólk á öllum aldri. Stórir árgangar barna, fjölgun aldraðra, aukið sjálfstæði fatlaðra og fleiri bótaþegar kalla á frekari úrræði. Auka þarf fjölbreytni í heilsurækt, íþrótta- og tómstundastarfi óháð aldri, kyni, færni, áhuga og efnahag. Hreyfing þarf ekki að kosta mikið, margir velja að stunda göngu, hlaup, hjólreiðar, sund og heimaæfingar. Mikilvægt er að þeir sem sækja skipulagða starfssemi hafi valkosti þar sem gæði eru sett ofar gróða.
Örugg útivist og ferðamáti
Samfylkingin vill samþættingu skóla og frístunda barna og unglinga þar sem tómstundavagnar eru fyrir alla. Almenningssamgöngur, göngu- og hjólastígar eiga að tengja heimili, skóla, heilsuræktar-, íþrótta- og tómstundamiðstöðvar. Umhverfi Kópavogs bíður upp á margbreytilegt landslag til hreyfingar og útivistar en breikka þarf samliggjandi göngu- og hjólastíga til að minnka slysahættu manna og dýra. Fyrir þá sem nota hjólið sem samgöngutæki og vilja fara hraðar yfir þarf samliggjandi gangstéttir, hjóla- og akbrautir líkt og í löndum þar sem hjólamenning er mikil.
Hollusta og vinnuvernd
Samfylkingin vill að nemendur á öllum skólastigum, starfsfólk bæjarins og þeir sem fá þjónustu í heimahús, í dagvist eða á sambýlum fái næringaríkar máltíðir. Tryggja skal að náms- og vinnuaðstaða styðji við vellíðan, góða líkamsbeitingu og öryggi.Starfsmenn bæjarins vinna mörg ólík störf við mismunandi aðstæður og huga þarf að andlegum og líkamlegum álagsþáttum sem og hvetja til hollra lífshátta til að vinna gegn heilsubresti.Álag og verkefni við hæfi, tímabundið eða langvarandi minnkað starfshlutfall og sveigjanlegur vinnutími hentar þeim sem búa við skerta starfsgetu. Heilsa, vellíðan og góð launakjör eru stór hluti af lífsgæðum. Hvetja skal fólk til að vinna til að halda heilsu fremur en að hafa heilsu til að vinna.
Samfylkingin vill að kópavogsbúar hafi fjölbreytta möguleika til að viðhalda heilbrigðum lífsstíl sem stuðlar að auknum lífslíkum og betri lífsgæðum. Heildræn sýn á heilsueflingu og vinnuvernd er mikilvæg þar sem virk lýðheilsustefna styður við heilsutengda hegðun. Bæjaryfirvöld eiga að meta gildi góðrar heilsu og vera meðvituð um að heilbrigðis-, velferðar, mennta-, íþrótta-, tómstunda, skipulags- og umhverfismál eru málaflokkar heilsueflingar.
-Hlín Bjarnadóttir, sjúkraþjálfari, skipar 11. sæti á lista Samfylkingarinnar.
