Út er komin bókin Hjartarætur – sagan hans pabba. Höfundur er Margrét Júlía Rafnsdóttir, Kópavogsbúi til áratuga, kennari við Snælandsskóla í meira en 20 ár og sat jafnframt í bæjarstjórn Kópavogs um tíma. Margrét Júlía ólst þó upp í miðbæ Reykjavíkur, nánar tiltekið á Týsgötu 8 við Óðinstorg, sem einmitt er sögusvið bókarinnar og spannar sagan meira en hundrað ár.
„Afi minn byggði húsið og pabbi bjó þar í meira en hálfa öld,“ segir Margrét. „Pabbi var einstakur maður og geta allir borið vitni um það er þekktu hann. Hann fór allt of snemma. Ég var mikil pabbastelpa og að missa hann, ég þó komin hátt á fertugsaldur, var mjög erfitt. Að pabba stóðu margir stólpar og langaði mig að kafa betur í sögu hans og í raun að skoða hvað það er sem gerir fólk að góðu fólki. Ég veiktist illa af Covid í mars 2020, ein af þeim fyrstu hér á landi og var lögð inn á spítala. Þar lá ég á stofu þar sem pabbi lá banaleguna. Sagan hans varð áleitin og ákvað ég þá að ekki væri eftir neinu að bíða að skrá hana. Ég hófst því strax handa, í raun á spítalanum. Þegar heim kom þurfti svo að grafa upp ýmsa pappíra og bréf til að vinna úr. Ég ákvað að gefa bókina út sjálf og hefur sagan fengið mjög jákvæðar umsagnir hjá þeim sem hafa lesið hana.“
Margét Júlía gefur sjálf út bókina og hægt er að kaupa hana beint. „Það má hafa samband við mig í margretjulia@gmail.com til að kaupa bók og einnig, ef einhver hefur áhuga á að taka einhver eintök til sölu. Svo kemur hún vonandi á bókasöfn síðar og jafnvel sem hjóðbók. Í bókinni eru einnig margar myndir sem fólki hefur þótt gaman að skoða.“
