Eftir þrjá sigurleiki í röð máttu HK-ingar sætta sig við tap gegn Dalvík/Reyni, 0:2, á Kópavogsvelli í 16. umferð 2. deildar karla í kvöld. HK seig þar með niður í þriðja sæti deildarinnar.
Heil umferð var leikin í deildinni í kvöld og önnur úrslit urðu þessi:
Höttur – ÍR 1:1
Ægir – Reynir S. 1:4
Njarðvík – KV 3:3
Grótta – Sindri 2:0
Afturelding – Höttur 6:1
Staðan eftir leiki kvöldsins: KV 32, Afturelding 31, HK 30, Grótta 27, ÍR 24, Dalvík/Reynir 25, Sindri 22, Njarðvík 20, Reynir S. 19, Ægir 17, Hamar 10, Höttur 7.
HK-ingar sóttu meira í fyrri hálfleiknum en sköpuðu sér ekki mörg færi gegn mjög þéttri vörn Dalvíkinga, sem voru hættulegir í skyndisóknum. Ein þeirra, á 35. mínútu, gaf hornspyrnu og uppúr henni skoraði Halldór Orri Hjaltason með hörkuskalla, 0:1. Þannig var staðan í hálfleik.
Dalvíkingar komu mjög grimmir til seinni hálfleiks, slógu HK-inga þar alveg útaf laginu, og fengu vítaspyrnu á 48. mínútu sem Pétur Heiðar Kristjánsson skoraði úr. Eftir það gekk HK mjög illa að ná takti í sinn leik, norðanmenn vörðust enn betur og gáfu fá færi á sér það sem eftir var leiks.
Guðmundur Atli Steinþórsson var næstur því að skora um miðjan síðari hálfleik, þegar hann fylgdi á eftir hörkuskoti Ólafs V. Júlíussonar, en Steinþór Auðunsson í marki Dalvíkur/Reynis varði glæsilega frá honum af stuttu færi. Steinþór lokaði skömmu seinna vel á Guðmund Atla og varði frá honum utarlega í vítateignum eftir að hann var sloppinn í gegnum vörnina.
Á lokakaflanum náði HK aldrei að opna vörn Dalvíkinga sem voru aftur á móti hættulegir í skyndisóknum sem fyrr og fengu tvö fín færi til að bæta við þriðja markinu en Beitir Ólafsson varði í bæði skiptin.
Dýrmæt stig sem þarna fóru í súginn og í staðinn fyrir að nýta sér jafnteflið hjá KV og komast í efsta sæti deildarinnar, missti HK Aftureldingu uppfyrir og seig niður í þriðja sætið. Gróttumenn eru komnir í fjórða sætið, aðeins þremur stigum neðar, og virðast líklegir til að blanda sér í baráttuna á lokasprettinum.
