Samkór Kópavogs syngur inn aðventuna á sínum árlegu jólatónleikum sunnudaginn 3. desember n.k. Tónleikarnir verða í Digraneskirkju og hefjast kl. 17:00.
Einsöngvari með kórnum að þessu sinni er tenórsöngvarinn Gunnar Björn Jónsson. Gunnar Björn nam sönglistina í söngskóla Sigurðar Demetz þar sem kennari hans var Kristján Jóhannsson. Eftir útskrift hélt hann til frekara náms í Milanó á Ítalíu. Gunnar Björn hefur sungið víða, hér heima og erlendis, unnið til verðlauna og sungið lykilhlutverk í óperum sem og tekið þátt í ýmsum viðburðum víða um heim, svo sem gjörningum Ragnars Kjartanssonar.
Söngstjóri kórsins, til farsælla tíu ára, er Friðrik S. Kristinsson. Í forföllum Friðriks mun Lenka Mátéová stjórna kórnum á tónleikunum. Meðleikari er Peter Maté og trompetleikarar eru Grímur Sigurðsson og Kristján Hermannsson.
Samkór Kópavogs hefur starfað nær óslitið í Kópvogi frá árinu 1966. Jan Morávek stofnaði kórinn ásamt nokkrum sönglöðum Kópavogsbúum. Allt frá stofnun hefur kórinn verið sterkur hlekkur í menningarlífi bæjarins. Auk þess að halda reglulega tónleika hefur kórinn haldið í fjölda söngferða, bæði innan – og utanlands.
Núverandi formaður kórsins er Sigríður V. Finnsdóttir. Kórfélagar eru nú um 50 talsins.
Kórinn æfir í Digraneskirkju á mánudagskvöldum. Samkórinn getur ávallt bætt við sig góðu söngfólki og hvetur áhugasama að hafa samband við formann eða með því að senda töluvpóst á samkor@samkor.is Heimasíða kórins er www.samkor.is og kórinn má einnig finna á Facebook.
Samkórinn býður bæjarbúum sem og öðrum innilega velkomin á tónleikana. Yfirskrift tónleikanna er FRIÐARJÓL. Á þessum tímum hamfara og stríðsátaka vill kórinn hugsa til þeirra sem eiga um sárt að binda og mikilvægis friðar og mannúðar. Efnisskrá tónleikanna er við allra hæfi, þekkt og falleg aðventu – og jólalög.
Miðaverð er kr. 3.500. Miðasala er hjá kórfélögum og við innganginn. Einnig er hægt að láta taka frá miða með því að senda tölvupóst á samkor@samkor.is.
