Kópavogsbær greiðir upp erlent lán.

Kópavogsbær gekk í vikunni frá síðustu greiðslu af 35 milljóna evru láni frá Dexia-banka sem tekið var í maí 2008 til fimm ára. Þar með eru erlendar skuldir bæjarins óverulegar og gengissveiflur nánast úr sögunni. Þetta kemur fram í tilkynningu frá Kópavogsbæ. 

Lánið hjá Dexia var eingreiðslulán en vegna gjaldeyrishafta og gjaldeyrisskorts var samið um dreifingu á greiðslum á því frá mars til september 2013. Það var greitt upp með láni á mjög hagstæðum kjörum frá Lánasjóði sveitarfélaganna og það sem út af stóð var greitt með handbæru fé.

Ármann Kr. Ólafsson, bæjarstjóri, segir að rík áhersla hafi verið lögð á að lækka skuldir bæjarins hratt og örugglega og að endurfjármagna óhagstæð lán á betri kjörum. „Sveiflur í afkomu lækka verulega við þessa uppgreiðslu og afborganir á næstu árum verða mun lægri en í ár. Stefnt er að því að fjármagna þær afborganir að stærstum hluta með rekstrarafgangi.“