Í mörg ár hefur Kópavogsbær lagt mikla áherslu á að framkvæmdum við Arnarnesveg verði lokið. Enda er um mikla samgöngubót og öryggismál að ræða, sérstaklega fyrir íbúa efri byggða Kópavogs. Lögregla, sjúkra- og slökkvilið telja framkvæmdina mjög mikilvæga svo viðbragðsaðilar geti sinnt skyldum sínum samkvæmt þeim tímamörkum sem þeir setja sér í viðbragðstíma innan höfuðborgarsvæðisins. Aðeins lokaáfanginn er nú eftir af þessari mikilvægu framkvæmd.
Óánægju með þessa fyrirhuguðu framkvæmd gætir hjá sumum íbúum í nágrenni vegstæðisins og er það í sjálfu sér ekkert óeðlilegt. Aðrir eru sáttir enda léttir þessi lokakafli mjög á umferð í gegnum þéttbyggt íbúðarsvæði. Sú staða er velþekkt þegar slíkar framkvæmdir eiga í hlut. Þessi framkvæmd hefur þó verið á skipulagi í mörg ár. Samkvæmt niðurstöðu Vegagerðarinnar er umhverfismat vegna hennar í gildi þar sem mörg ár eru síðan framkvæmdir hófust. Fyrir því eru dómafordæmi að hefjist framkvæmd innan skilgreinds gildistíma umhverfismats þá falli úr gildi þeir tímafrestir sem lög gera ráð fyrir.
Lokaáfangi Arnarnesvegar er hluti af samgöngusáttmála höfuðborgarsvæðisins og sú framkvæmd sem forsvarsmenn bæjarins hafa lagt mesta áherslu á. Í heildina má segja að samkvæmt þeim sáttmála sé ekki um að ræða hlutfallslega miklar framkvæmdir innan bæjarfélagsins í samanburði við önnur sveitarfélög á svæðinu.
Allan tímann hefur verið reiknað með mislægum gatnamótum Arnarnesvegar og Breiðholtsbrautar. Þannig var umhverfismat samþykkt á sínum tíma. Á síðasta ári gaf Vegagerðin út kort þar sem skýrt kemur fram að gert er ráð fyrir mislægum gatnamótum. Samkvæmt sáttmálanum er reiknað með að framkvæmdum við þennan vegarkafla verði lokið á næsta ári. Við þau tímamót setja forsvarsmenn borgarinnar niður fótinn og vilja aðrar lausnir sem gera ráð fyrir ljósastýrðum gatnamótum. Það er í samræmi við aðrar áherslur borgarinnar þar sem mikil andstaða virðist vera við mislæg gatnamót.
Markmiðin sem lágu til grundvallar samgöngusáttmálanum eru í fjórum liðum. Þar segir m.a. í þremur af þeim atriðum:
1. Greiðar, hagkvæmar og skilvirkar samgöngur á höfuðborgarsvæðinu með jafnri uppbyggingu innviða allra samgöngumáta.
2. Stuðla að því að ná loftlagsmarkmiðum ríkis og sveitarfélaga um sjálfbært, kolefnishlutlaust borgarsamfélag.
3. Stuðla að auknu umferðaröryggi með það að markmiði að draga stórlega úr umferðarslysum.
Í stuttu máli má segja að sú tillaga sem nú er á borðinu uppfylli ekkert þessara markmiða. Þar er gert ráð fyrir ljósastýrðum gatnamótum með brú en sú lausn er, af mörgum ástæðum, alls ekki ásættanleg samkvæmt þeim markmiðum sem á að fara eftir. Fyrsti valkostur Vegagerðarinnar eru mislæg gatnamót eins og gert var ráð fyrir. Með þeim væru einnig markmið samgöngusáttmálans tryggð við þessa framkvæmd.
Það er óásættanlegt að forsvarsmenn Kópavogsbæjar séu knúnir í aðrar útfærslur vegna dynta forystumanna Reykjavíkurborgar. Kópavogsbúar og aðrir sem fara þarna um í framtíðinni eiga ekki að sætta sig við annað en bestu lausn á þessum gatnamótum, ekki þá næstbestu.
Samkomulagið var undirritað í góðri trú. Þar var ekki skrifað smátt letur um útfærslu hverrar framkvæmdar fyrir sig. Með samkomulaginu undirgangast sveitarfélögin að unnið sé samkvæmt þeim markmiðum sem eru grundvöllur samkomulagsins. Mismunandi sjónarmið vegna einstakra framkvæmda geta og eiga ekki að ráð för. Þetta er ekki einhver konfektkassi þar sem aðilar velja bara þá mola sem þeim finnast bestir.
120 milljarða framkvæmdir sem fyrirhugaðar eru á næstu 15 árum við uppbyggingu samgöngumannvirkja á höfuðborgarsvæðinu munu gjörbreyta aðstæðum til hins betra. Við verðum að vanda hvert skref og forðast að misstíga okkur á fyrstu metrunum. Það getur haft þær afleiðingar að við höltrum í gegnum þessi mikilvægu verkefni.
