Sett hefur verið upp lítil og hugguleg myndlistarsýning á fyrstu hæð Smáralindar en þar er á ferðinni listakonan og Kópavogsbúinn Harpa Dís Hákonardóttir. Hún kemur úr Kársnesinu og hefur frá unga aldri fengist við listir á einn eða annan hátt. Yfir vetrartímann stundar Harpa Dís myndlistarnám í Konstskolan Idun Lovén í Stokkhólmi en í sumar vinnur hún í Skapandi sumarstörfum í Kópavogi undir verkefninu Kópavogsbúinn. Kópavogur varð 60 ára á þessu ári og að því tilefni hefur hún notað sumarið til að velta upp spurningunni um hver hinn eiginlegi Kópavogsbúi sé.
Eftir vettvangsferðir, lestur og skissuvinnu hefur Harpa Dís málað seríu olíumálverka. Á sýningunni má sjá hluta af verkum hennar en verkin verða sýnd í heild sinni á lokahátíð Skapandi sumarstarfa í Molanum þann 23. júlí næstkomandi.
Sjá heimasíðu verkefnisins með því að smella hér
