Rafræn kosning fyrir 16 ára og eldri.
Kosning hefst í dag, fimmtudaginn 25. ágúst, í verkefninu Okkar Kópavogur. Alls eru 100 hugmyndir í kosningu, 20 í hverju hverfi. Kosningin er rafræn og geta íbúar Kópavogs tekið þátt. Hugmyndirnar eru af fjölbreyttum toga og kosta frá 1 milljón til 20 milljóna í framkvæmd. Hverfunum hefur verið ráðstafað fé í hlutfalli við fjölda íbúa en alls verður 200 milljónum varið til framkvæmda verkefnanna.
Hugmyndasöfnun verkefnisins fór fram í vor, bæði á vef verkefnisins og íbúafundum. „Kópavogsbúar sýndu verkefninu Okkar Kópavogur mikinn áhuga og skiluðu inn fjölmörgum spennandi hugmyndum. Nú er komið að því að kjósa og ég vonast til að sem flestir taki þátt og hafi þannig áhrif á umhverfi sitt og nærsamfélag,“ segir Ármann Kr. Ólafson bæjarstjóri. Með verkefninu Okkar Kópavogur er verið að efla íbúalýðræði í bænum og auka samráð íbúa og bæjaryfirvalda. „Við viljum virkja íbúa til að taka þátt í verkefnum með okkur og Okkar Kópavogur er dæmi um það. Nú er tækifæri fyrir íbúa að velja verkefni og taka þannig þátt í forgangsröðun fjármuna sveitarfélagsins,“ segir Theodóra S. Þorsteinsdóttir formaður bæjarráðs. Kosning á milli verkefna verður frá 25. ágúst til 4. september. Íbúar Kópavogs, 16 ára og eldri geta tekið þátt. Velja þarf eitt hverfi til að kjósa í en þátttakendur þurfa ekki að velja hverfi eftir búsetu. Kosningin fer fram á vef verkefnisins www.kopavogur.is/okkar- kopavogur. Á meðan á kosningu stendur verður rafrænn kjörstaður í Bókasafni Kópavogs og í þjónustuveri bæjaraskrifstofa, Fannborg 2. Þar verður hægt að fá aðgang að tölvum og aðstoð á opnunartíma. Framkvæmdir á verkefnum hefjast í haust, en mun ljúka á næsta ári. Nánari upplýsingar: http://www.kopavogur.is/okkarkopavogur
