Kosningavetur í nánd. Y-listi Kópavogsbúa auglýsir framboð.

ritstjorn

16/10/2013

Það stefnir í hörkuspennandi viðureignir á hinu pólitíska litrófi í Kópavogspólitíkinni í vetur. Kosið verður til sveitarstjórna í maí og flokkarnir eru að komast í startholurnar. Listi Kópavogsbúa, sem hefur listabókstafinn Y, ríður á vaðið með auglýsingu á Facebook síðu flokksins þar sem Kópavogsbúar eru hvattir til að taka þátt í starfi listans. 12 manns skrifa undir auglýsinguna, sem væntanlega þýðir þá að listinn sé fullmannaður fyrir kosningar.

Kópavogslistinn er kominn í gírinn og er byrjaður að auglýsa framboð sitt fyrir kosningar í vor.

Sjálfstæðismenn eru byrjaðir að undirbúa sig fyrir prófkjör sem mun líklega fara fram í lok janúar. Innan þeirra raða er beðið eftir tilkynningu frá Gunnari I. Birgissyni hvort hann muni bjóða sig fram í fyrsta sæti listans á ný eða ekki. Aðrir flokkar eru í startholunum að gera sig klára fyrir kosningaveturinn sem verður án efa með fjörugra móti, ef marka má umræður úr bæjarráði þar sem bæjarfulltrúar kljást með bókunum um margvísleg mál.