Á sama tíma og rætt er um að reisa 18 þúsund fermetra byggingu undir læknamiðstöð við Skógarlind í Kópavogi stendur 16 þúsund fermetra ókláruð skrifstofubygging með 9 þúsund fermetra bílakjallara auð við Urðarhvarf. Húsið blasir við vegfarendum á leið í og úr Vatnsendahverfinu. Bogadreginn glerveggur hússins myndar einskonar inngang inn í hið nýja hverfi Kópavogs meðfram Breiðholtsbrautinni. Íbúar í hverfinu kalla hana góðlátlega „Kreppuhöllina“ enda hefur hún staðið auð frá því eftir hrun. ÞG Verktakar byggðu þetta hús en Íslandsbanki leysti hana til sín árið 2011. Fjárfestar hafa sýnt húsinu aukinn áhuga en kauptilboð hafa verið með fyrirvara um fjármögnun og öll fallið á því. Tillaga um að breyta Kreppuhöllinni í íbúðahúsnæði var felld í bæjarstjórn Kópavogs nýverið, enda hvílir ennþá hundruð milljóna króna virðisaukaskattskvöð á húsinu sem tengist atvinnustarfsemi en ekki venjulegum íbúðum, samkvæmt upplýsingum Kópavogsblaðsins.
Fasteignasalar, sem Kópavogsblaðið hefur rætt við, eru þó bjartsýnir á að það verði ekki langt að bíða þar til líf færist í Kreppuhöllina við Urðarhvarf enda eru þróttmikil fyrirtæki farin að flytja í hverfið. Mannvit flutti nýlega starfsemi sína í Urðarhvarf, Reebokfitness er að fara að opna líkamsræktarstöð við sömu götu eftir áramót og þá festi Snorri Hjaltason, byggingaverktaki, nýlega kaup á 7.500 fermetra húsi í Víkurhvarfi.
Auglýst verð á Kreppuhöllinni við Urðarhvarf 8 er 775 milljónir en fasteignamat er 236 milljónir.
