Það verður mikið fjör í Garðabæ um næstu helgi þegar 600 börn á aldrinum 8 – 15 ára streyma með hljóðfærin sín í bæinn til að taka þátt í landsmóti skólalúðrasveita. Þátttakendur koma víða að, m.a. frá Akureyri, Fáskrúðsfirði og Vestmannaeyjum og eiga það sameiginlegt að hafa gaman af góðri tónlist og hljóðfæraleik. Krakkarnir leika meða annars á flautur og túbur, trompeta og básúnur, trommur og saxófóna.
Þegar á mótið er komið er öllum skaranum skipt niður í sex stórar hljómsveitir með 80 til 100 börnum í hverri sveit og að auki er líka sérstök hljómsveit fyrir trommarana. Hver sveit æfir saman nokkur lög yfir helgina undir stjórn reyndra hljómsveitarstjóra og allir leggja sig fram um að ná sem mestum árangri á stuttum tíma. Á milli æfinga er ýmislegt gert til að brjóta upp dagskrána m.a. með því að fara í ratleiki og sund. Í lok mótsins, klukkan 13 á sunnudaginn, koma svo allar sveitirnar saman í íþróttahúsinu Ásgarði og halda tónleika fyrir gesti og gangandi með lögunum sem búið er að æfa yfir helgina. Þar gefst almenningi kostur á að sjá og heyra fjölmennustu og litríkustu blásarasveitir landsins sýna listir sínar.
Mót sem þessi hafa verið haldin að jafnaði annaðhvert ár síðan árið 1970 og hafa þau alltaf verið einn af hápunktum í starfi skólalúðrasveita landsins. Leikgleðin er alltaf í fyrirrúmi og gengur stundum mikið á þegar verið er að æfa fjörug lög með svona mörgum krökkum en þegar upp er staðið er það gleðin yfir vel unnu verki sem situr eftir. Á hljómsveitarmóti er ekki keppt í því hver spilar best, eða hraðast eða sterkast heldur er markmiðið alltaf að ná góðri samvinnu allra hljóðfæraleikara og gleðjast yfir árangrinum.
