Langtímalausnir í stað töfralausna

Viðreisn er ungur flokkur sem setur almannahagsmuni í öndvegi og hefur þor til að breyta hvar sem honum sýnist það geta orðið til framfara. Við höfum sýnt það í verki í störfum okkar í ríkisstjórninni og við sýnum það í öllum okkar pólitísku áherslum. Við viljum breyta úreltum kerfum og færa þau til nútímans. Við höfum allt að vinna – engu að tapa. Ekkert frekar en allur þorri almennings sem vill búa í frjálsu og fordómalausu samfélagi.

Við erum einlægur velferðarflokkur sem lætur sér annt um þétt riðið öryggisnet og vandaða þjónustu í íslensku samfélagi. En við viljum staðgreiða þann veruleika en ekki taka hann að láni eins og berlega hefur komið í ljós að flokkarnir á vinstri vængnum hyggjast gera. Við viljum sjálfbæra velferð sem grundvallast á öflugri verðmætasköpun atvinnulífsins. Hornsteininn að þeim verðmætum leggjum við með fjárfestingu í menntun, rannsóknum og nýsköpun í háskólasamfélaginu. Afrakstrinum verjum við í grunnmenntun, heilbrigðisþjónustu, vegakerfi, fjarskipti, orkudreifingu, löggæslu, menningarstarfsemi og allt það annað sem gerir samfélag okkar samkeppnishæft á alþjóðavísu. Velferð og vellíðan er hins vegar lítils virði ef við höfum ekki að henni jafnan aðgang. Þess vegna kappkostar Viðreisn að spegla alla sína pólitísku sýn út frá nótum jafnréttis. Við höfum náð miklum árangri í launajafnrétti kynjanna og viljum fylgja honum eftir með því að efna til víðtækrar þjóðarsáttar um bætt kjör kvennastétta.

Kæru Kópavogsbúar. Við í Viðreisn erum ekki að bjóða upp á neinar töfralausnir fyrir þessar kosningar en við bjóðum upp á lausnir sem virka til langrar framtíðar. Í því felast ýmsar nauðsynlegar kerfisbreytingar sem nauðsynlegt er að ráðast í og munu skipta sköpum fyrir íslenskt samfélag á komandi áratugum. Það sem meira er þá hefur Viðreisn það sem þarf til að leiða sín stefnumál til lykta. Kjarkinn til breyta, reynsluna til að koma málum áfram og gleðina til að missa ekki móðinn þegar á móti blæs.