Kópavogsdagar, menningarhátíð Kópavogsbæjar, hófust í dag með gjörningi listakonunnar Eyglóar Benediktsdóttur. Gjörningurinn Líf/Leaf felst í því að hengja handmótuð postulínslauf á tré við Café Dix í Hamraborginni.
Í verkinu fæst Eygló við æskuminningar sínar. Amma hennar líkti laufum við hringrás lífsins en Eygló tók því bókstaflega. „En fólk deyr ekki bara á haustin er það nokkuð krakkar,“ spurði Eygló leikskólabörn frá Kópahvoli og Læk sem tóku þátt í gjörningnum með listakonunni sem gerir í verkinu tilraun til að bjarga lífum. Gjörningurinnn heldur áfram á laugardag.
Ármann Kr. Ólafsson bæjarstjóri í Kópavogi setti hátíðina. „Það er vel við hæfi að fá leikskólabörn til liðs við okkur í gjörningi sem fjallar um minningar bernskunnar,“ sagði hann við tækifærið. Ármann sagði ánægjulegt hversu margir taka þátt í Kópavogsdögum í ár. „Að þessu sinni var auglýst eftir þátttöku listamanna og niðurstaðan er öflugri hátíð en undanfarin ár. Þá er ókeypis inn á flesta viðburði þannig að allir eiga að geta notið Kópavogsdaga.“
Þetta er í ellefta sinn sem Kópavogsdagar eru haldnir en hátíðin stendur til sunnudagsins 11. maí. Viðburðir eru af ýmsum toga og má nefna pönkhátíð á Spot og í Molanum, ævintýraleikrit fyrir börn í Bókasafni Kópavogs, djass og franskar aríur í Tónlistarsafni Íslands, spuna og leik í húsnæði Leikfélags Kópavogs og veggjalist í Hamraborginni. Ljóð fljóta í sundlaugum bæjarins og Karlakór Kópavogs ætlar að vera á rúntinum á laugardeginum og syngja fyrir gesti víða um bæ.
Á síðasta degi hátíðarinnar verður upplýst um útnefningu heiðurslistamanns og bæjarlistamanna. Athöfnin fer fram í Gerðarsafni. Lista- og menningarráð hefur frá árinu 1988 valið heiðurslistamann en í fyrsta sinn nú eru jafnframt útnefndir bæjarlistamenn. Með fyrrnefnda valinu er verið að heiðra listamann fyrir ævistarf en með síðarnefnda valinu er verið að velja efnilega listamenn til að sinna ákveðnu fræðslu – og menningarstarfi.
Nánar um Kópavogsdaga á www.kopavogsdagar.is
